“დარიალი ენერჯისა” და ევროპის რეკონსტრუქციის და განვითარების ბანკს შორის ფინანსირების ხელშეკრულება გაფორმდა

სს “დარიალი ენერჯისა” და ევროპის რეკონსტრუქციის და განვითარების ბანკს შორის ფინანსირების ხელშეკრულება გაფორმდა. როგორც “თბილისი თაიმსს” ენერგეტიკის სამინისტროდან აცნობეს, სს “დარიალიენერჯის” დირექტორ, ზურაბ ალავიძესა და ევროპის რეკონსტრუქციისა და განვითარების ბანკის ენერგეტიკის მიმართულების ხელმძღვანელ, ნანდიტა ფარშადს შორის ფინანსირების ხელშეკრულების ხელმოწერის ცერემონიალს ვიცე პრემიერი/ენერეგტიკის მინისტრი კახა კალაძე, სასტუმრო “რედისონ ბლუ ივერიაში” დაესწრო. სამინისტროს ინფორმაციით, ხელი მოეწერა ფინანსირების ხელშეკრულებას 80 მილიონ აშშ დოლარამდე სესხის გამოყოფის შესახებ, დარიალის ჰიდროელექტროსადგურის განვითარების, მშენებლობის და ექსპლუატაციაში გაშვების დაფინანსებაზე, რაც წარმოადგენს პირდაპირი პროექტის ფინანსირების და წარმატებული საზოგადოებრივი კერძო პარტნიორობის პირველ პროექტს საქართველოს ენერგოსექტორში. ენერგეტიკის სამინისტროს ინფორმაციით, “დარიალჰესის” მშენებლობა 2012 წელს დაიწყო და მისი დასრულება 2015 წლის დეკემბერში იგეგმება. “დარიალიჰესის ” დადგმული სიმძლავრე 108 მგვტ-ია. წლიური გამომუშავება 510 მლნ კვტ/სთ სავარაუდო საინვესტიციო ღირებულება 124მლნ აშშ დოლარს შეადგენს. ჰიდროელექტროსადგური ყაზბეგის მუნიციპატიტეტში მდინარე თერგზე შენდება. უწყების ინფორმაციით, მშენებლობის სხვადასხვა ეტაპებზე დასაქმდება 300-მდე ადგილობივი მოსახლე, ხოლო ექსპლუატაციის ეტაპზე შეიქმნება 20 მუდიმივი სამუშაო ადგილი. სამინისტროში აცხადებენ, რომ დარიალის ჰესი იქნება ერთსაფეხურიანი, მდინარის დინებაზე მომუშავე ჰიდროელექტროსადგური. მათივე ინფორმაციით, ამგვარი სტრუქტურა გამორიცხავს მდინარის ზედა ნაწილის დაგუბებას და ამცირებს მასთან ასოცირებული მშენებლობის მასშტაბებს, რაც მნიშვნელოვნად ამცირებს გარემოზე ნეგატიურ ზემოქმედებას როგორც მოკლევადიან, ასევე გრძელვადიან პერსპექტივაში. 06.11.14