“თავისუფალი დემოკრატების” ლიდერი ირაკლი ალასანია დღეს კანადაში გაემგზავრა. როგორც ჟურნალისტებს ალასანიამ თბილისის საერთაშორისო აეროპორტში განუცხადა, კანადაში უსაფრთხოების ფორუმში მიიღებს მონაწილეობას, რის შემდეგაც აშშ-ში გაემგზავრება, სადაც შეხვდება ამერიკის შეერთებული შტატების სახელმწიფო დეპარტამენტის წარმომადგენლებს, სხვა მაღალჩინოსნებს.
“ვაშინგტონში მექნება შეხვედრები იმ ადამიანებთან, ვინც ჩართულია საქართველოს მიმართ პოლიტიკის წარმოებაში ამერიკის მხრიდან. ასევე გვექნება საუბარი უსაფრთხოებაზე, პოლიტიკაზე. მივაწვდი ინფორმაციას, თუ რას და როგორ ვხედავ საჭიროდ, რომ აშშ, როგორც სტრატეგიული პარტნიორი, დაეხმაროს საქართველოს იმ პრობლემების გამოსწორებაში, რომელსაც უშვებს ხელისუფლება. საუბარი იმ ფორმაზე, რა ფორმითაც ბოლო კვირების განმავლობაში მათ განახორციელეს პოლიტიკური ნიშნით შემოტევა პოლიტიკურ ლიდერებზე. დარწმუნებული ვარ, რომ ამერიკა იქნება ერთ-ერთ მთავარი მხარდამჭერი დემოკრატიული განვითარების”, – განაცხადა ალასანიამ.
რაც შეეხება უსაფრთხოების ფორუმს, ალასანიას თქმით, ფორუმზე თავდაცვისუნარიანობის ამაღლების საკითხებზე ისაუბრებს.
“საქართველოს ახლა კიდევ უფრო სწრაფად სჭირდება ამერიკის და ნატო-ს მხარდაჭერა, რომ პოტენციური საფრთხეებისგან თავი დაიცვას. ეს საფრთხეები დღითიდღე იზრდება. თუ დავაკვირდებით, რა ხდება უკრაინაში, რუსეთის ნაბიჯები მიუთითებს იმაზე, რომ საქართველოს სჭირდება ძალიან კონკრეტული ქმედითი ნაბიჯები, რათა ქვეყნის ტერიტორიაზე განთავსდეს რაც შეიძლება სწრაფად საწვრთნელი ბაზები, რაც მომავალში შემაკავებელ ფუნქციას განახორციელებს”, – განაცხადა ალასანიამ.
ირაკლი ალასანია კანადასა და ამერიკაში ვიზიტს 30 ნოემბერს დაასრულებს.
20.11.14
Discussion about this post