დავით ნარმანიამ გერმანელ ბიზნესმენებს ავტომაგისტრალის რუისი-აგარის მონაკვეთზე მშენებლობა დაათვალიერებინა

დავით ნარმანიამ გერმანელ ბიზნესმენთა დელეგაციას ავტომაგისტრალის რუისი-აგარის მონაკვეთზე მიმდინარე მშენებლობა დაათვალიერებინა.

რეგიონული განვითარებისა და ინფრასტრუქტურის სამინისტროს ცნობით, ობიექტით ბიზნესმენები თავად დაინტერესდნენ და ავტომაგისტრალის მშენებლობის ტექნოლოგიებს ადგილზე გაეცნენ.

რუისი-აგარის მონაკვეთზე სტუმრებთან ერთად საავტომობილო გზების დეპარტამენტის წარმომადგენლებიც იმყოფებოდნენ.

გერმანელ ბიზნესმენთა ჯგუფი საქართველოში გერმანიის ეკონომიკისა და ტექნოლოგიების ფედერალური სამინისტროსა და გერმანიის აღმოსავლეთისა და ცენტრალური ევროპის ეკონომიკური გაერთიანების ორგანიზებით ჩამოვიდნენ.
ვიზიტის მიზანია, გერმანული ბიზნესსექტორის წარმომადგენლებმა მიიღონ სრული ინფორმაცია საქართველოში სამშენებლო ბიზნესის განვითარების შესაძლებლობების შესახებ და ამ პროცესში გერმანული კაპიტალის მონაწილეობის შესაძლებლობებზე.
ვიზიტის ფარგლებში უკვე გაიმართა შეხვედრები რეგიონული განვითარებისა და ეკონომიკის მინისტრებთან. ბიზნესმენები სხვა კერძო თუ სახელმწიფო სტრუქტურების წარმომადგენლებსაც შეხვდებიან. ვიზიტი 14 მაისს დაიწყო და 19 მაისს დასრულდება.

15.05.13