ოთხ რელიგიურ კონფესიას საბჭოთა კავშირის დროს მიყენებული ზიანი ნაწილობრივ აუნაზღაურდა

მთავრობის დადგენილება, ოთხი რელიგიური კონფესიისთვის საბჭოთა კავშირის დროს მიყენებული ზიანის ნაწილობრივი ანაზღაურების შესახებ შესრულებულია, – ამის შესახებ პრემიერ–მინისტრ ირაკლი ღარიბაშვილის რელიგიური კონფესიების წარმომადგენლებთან გამართულ შეხვედრაზე აღინიშნა. როგორც “თბილისი თაიმსს” პრემიერ-მინისტრის პრესსამსახურიდან აცნობეს, შეხვედრაზე ირაკლი ღარიბაშვილი კონფესიების დაფინანსებასთან დაკავშირებით მიმდინარე პროცედურებით დაინტერესდა და რელიგიის საკითხთა სახელმწიფო სააგენტოს ხელმძღვანელს მოკლე ანგარიშის წარდგენა სთხოვა. ზაზა ვაშაყმაძის განმარტებით, პრემიერის დავალება შესრულებულია, სახელმწიფოს მხრიდან ოთხივე კონფესიასთან გაფორმებულია ხელშეკრულება და გადანაწილებული თანხები დარიცხულია მათ ანგარიშზე. “დავალება, რომელიც მოცემული იყო თქვენი ხელმძღვანელობით და დადგენილება რომელიც მიღებული იყო მთავრობის მიერ საბჭოთა პერიოდში მიყენებული ზიანის ნაწილობრივ ანაზღაურებასთან დაკავშირებით, შესრულებულია. დღეს წარმოდგენილია მთავრობის დადგენილებით გათვალისწინებული ოთხი კონფესია: საქართველოში მუსლიმური თემი, სომხური სამოციქულო მართლმადიდებელი ეკლესია, კათოლიკური ეკლესია და ებრაული თემი. სახელმწიფომ აიღო კეთილი ნება და გამოყო რამდენიმე მილიონი ლარი. ოთხივე კონფესიასთან გაფორმებულია ხელშეკრულება სახელმიფოს მხრიდან, რელიგიის სააგენტოსა და თითოელ კონფესიას შორის, აღნიშნული თანხები, რომელიც გადანაწილებული იყო, დარიცხულია მათ ანგარიშზე. შესაბამისად, პროექტი შედგა”, – აღნიშნა ზაზა ვაშაყმაძემ. მთავრობის დადგენილების მიხედვით, საქართველოში არსებულ ოთხ კონფესიას – ებრაულთა და მუსლიმთა თემებს, სომეხთა სამოციქულო მართლმადიდებელ ეკლესიას და კათოლიკურ ეკლესიას გამოეყოთ ფინანსური კონპენსაციები საბჭოთა ტოტალიტარიზმის პერიოდში მიყენებული მორალურ-მატეტიალური კონპენსაციის მიზნით. 24.12.14