1 ივნისს, ზაფხულის პირველ დღეს, ბავშვთა ქალაქში – „მზიური“, „მზის ფესტივალი – ჩვენ ვხედავთ მზეს გაიმართება. ამ დღეს, მზიურში მოსული ყველა სტუმარი, ზღაპრის გმირებით დასახლებულ ქალაქში ხვდება. ეს ის ზღაპრული ქალაქია, სადაც ყველა სიყვარულითა და მზით თანაბრად თბება, მიუხედავად მათი ფიზიკური, თუ გონებრივი შესაძლებლობებისა, სოციალური სტატუსისა.
წელს ფესტივალის საიუბილეო თარიღია. 10 წელი ხდება რაც ნოდარ დუმბაძის ინიციატივით, 1982 წელიდან, თბილისში დაარსებულ ბავშვთა ქალაქ – მზიურში, მზის ფესტივალი იმართება. ეს სწორედ ის განსაკუთრებული დღეა, როდესაც ოცნებები ხდება და ზღაპრულ სამყაროში მოსულ სტუმრებს, სხვადასხვა ზღაპრის გმირებთან ერთად, ფესტივალის მთავარი გმირი – თოჯინამზე, ელოდება. ფესტივალზე ასევე კონცერტები, თეატრალური დადგმები, გამოფენები და სხვადასხვა კონკურსები გაიმართება.
ნოდარ დუმბაძის ოცნების ასრულება, მრავალი პროქეტის ავტორმა, ფოტოგრაფმა, ანა გოგუაძემ 2006 წელს დაიწყო. სწორედ ის არის მზის ფესტივალის სულისჩამდგმელი და ორგანიზატორი, რომელსაც „თბილისი თაიმსი“ ფესტივალზე და ბავშვთა ქალაქში არსებულ პრობლემებზე ესაუბრა.
ანა თქვენ პროექტის – „მზის ფესტივალის“ იდეის ავტორი ხართ, გვიამბეთ აღნიშნული პროექტის შესახებ, როდის და როგორ გაჩნდა ეს იდეა?
– ძალიან მიყვარს ნოდარ დუმბაძის შემოქმედება. სამწუხაროდ დღეს “მზიური” “ბავშვთა ქალაქის” ნაცვლად მხოლოდ პარკის ფუნქციას ასრულებს. იდეა 2006 წლის გაზაფხულზე, “მზიურში” სეირნობისას დაიბადა. ეს ბედნიერი ადამიანებით სავსე, ერთი დღე უნდა ყოფილიყო, სადაც დიდი თუ პატარა ყველა ერთად გაერთობოდა, დროებით დაივიწყებდა ყოფით პრობლემებს და ზაფხულის პირველ დღეს “მზიურში” პოზიტიურად გაატარებდა. იდეა დავწერე forum.ge-ზე რის შემდეგაც ბევრმა ადამიანმა აიტაცა. ღონისძიების სპონსორებიც მალევე გამოჩნდნენ. ყოველწლიურად მზის ფესტივალში ათობით მოხალისე იღებს მონაწილეობას, მეგობრებისა და პარტნიორების ძალისხმევით ყოველ პირველ ივნისს, “მზიური“ ნამდვილი ბავშვთა ქალაქია. თავდაპირველად ღონისძიებას “მზის ზეიმი” ეწოდებოდა, დღეს კი, „მზის ფესტივალი – „ჩვენ ვხედავთ მზეს“, რამ განაპირობა სახელწოდების შეცვლა?
– მაშინ ვერც ვიფიქრებდი, რომ ღონისძიება ყოვილწლიურ სახეს მიიღებდა, ამიტომაც მას “მზის ზეიმი” დავარქვით. პირველივე წელს, ფესტივალზე უამრავი ადამიანი მოვიდა, ამიტომაც გადავწყვიტე, რომ ეს არ უნდა ყოფილიყო ერთჯერადი ღონისძიება. მზის ფესტივალის უცვლელი სლოგანია – “ჩვენ ვხედავთ მზეს” და უკვე მეათე წელია „მზიურში“ იმართება. ეს არის დღე, როდესაც „მზიური“დუმბაძის ბავშვთა ქალაქი ხდება.
პროექტის ერთ-ერთი მთავარი მიზანი სპეციალური საჭიროების მქონე ბავშვების საზოგადოებრივ ცხოვრებაში ჩართულობის გაზრდაა, როგორ ფიქრობთ რა შეიცვალა ამ მხრივ 2006 წლიდან დღემდე? ზოგადად რამდენად ამაღლდა ამ მხრივ საზოგადოების ცნობიერება?
– სამწუხაროდ ჩვენს ქვეყანაში ამ კუთხით, დღემდე ბევრი მოუგვარებელი პრობლემაა, რაც გულისხმობს: გარემოს ადაპტირებას, საზოგადოების დამოკიდებულებასა და ა.შ. მაგრამ თამამად შემიძლია იმის თქმა, რომ 2006 წლის შემდეგ საკმაოდ ბევრი რამ შეიცვალა, მართალია პროცესი ნელა მიმდინარეობს და გაცილებით სწრაფადაც შეიძლება სასიკეთო ცვლილებების განხორციელება, მაგრამ „მზის ფესტივალი“ ნათელი მაგალითია იმის, რომ “შესაძლებლობები შეუზღუდავია”.
ანა, 10 წლის მანძილზე თუ ყოფილა ისეთი განსაკუთრებული შემთხვევა, რომელმაც ღონისძიება უფრო შთამბეჭდავი და დასამახსოვრებელი გახადა?
– ყოველ წელს არის სხვადასხვა დეტალები რომლებიც ემატება ჩვენს ფესტივალს, მიჭირს რომელიმე კონკრეტული მაგალითის მოყვანა, ჩვენ ვცდილობთ, რომ 1 ივნისს „მზიური“ ყველასათვის დასამახსოვრებელი მზიანი იყოს.
სახელმწიფო თუ ინტერესდება აღნიშნული პროექტით და გაქვთ თუ არა მათგან ფინანსური მხარდაჭერა?
– 2008 წლიდან მზის ფესტივალის ერთ-ერთი აქტიური მხარდამჭერი ქალაქის მერიაა, ბოლო სამი წელია პროგრამაში დავამატეთ ინკლუზიური სპექტაკლები, რომლის მხარდამჭერიც სპორტისა და ახალგაზრდობის საქმეთა სამინისტროა. ფესტივალს უერთდება როგორც სამთავრობო, ასევე არასამთავრობო სექტორი, ღონისძიების ერთგული მეგობარი და თანაორგანიზატორი კი კომპანია “ჯეოსელია”.
როგორც ვიცი, მზიურის მოუწესრიგებლობას უჩიოდით და მერიას პეტიციითაც კი მიმართეთ, კონკრეტულად რას ითხოვდით და რა რეაგირება მოჰყვა ამას?
– მერიას პეტიციით მანქანების სადგომთან დაკავშირებით მივმართეთ, მოქალაქეები მანქანებს ბავშვებისთვის განკუთვნილ მოედანზე აჩერებდნენ. როგორც მითხრეს პრობლემა მოგვარებულია. ჯერ-ჯერობით მხოლოდ დაცვის კონტროლის ქვეშაა, თუმცა მალე ამკრძალავი ნიშანიც დაიდგმება. ახლა ღია წერილით თბილისის მერს მივმართე და იმედი მაქვს, რომ ამ წერილს გამოეხმაურება. უკვე წლებია მზიური რეაბილიტაციას საჭიროებს, მისი შესასვლელი მთლიანად გაძარცულია და აღდგენით სამუშაოებს საჭიროებს. არ შეიძლება ქალაქის ერთ-ერთი მთავარი პარკის შესასვლელი ასეთ მდგომარეობაში იყოს.
აღსანიშნავია, რომ წელს ფესტივალის 10 წლის იუბილეა, მზიურში საიუბილეო ბანერიც უკვე გამოჩნდა, რა სიახლეებით უმასპინძლებთ ფესტივალზე მოსულ სტუმრებსა და გეგმავთ თუ არა რაიმე განსაკუთრებულ ღონისძიებას?
– ფესტივალისთვის მზადებას ტრადიციულად გაზაფხულის პირველ დღეს ვიწყებთ, ვინაიდან წელს საიუბილეო თარიღია, ბანერი რამოდენიმე თვით ადრე დავკიდეთ. ტრადიციულად, ბევრ სიახლეს ვთავაზობთ ჩვენს სტუმრებს და რაც მთავარია – ყველას გეპატიჟებით ჩვენს დაბადების დღეზე. დეტალებისგან ჯერ თავს შევიკავებ, თუმცა მზადება დაწყებულია.
„თბილისი თაიმსი“ ანა გოგუაძესა და „მზის ფესტივალს“ წარმატებებს უსურვებს.
ესაუბრა
ლაკო ბიტ-ბაბიკოვი