ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ინფორმაციით, ეკომიგრანტ ოჯახებს სახლები გადაეცათ.
უწყების ინფორმაციით, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი, შვეიცარიის განვითარებისა და თანამშრომლობის სააგენტოს (SDC) რეგიონული დირექტორი რუდოლფ შოხი, გურიის გუბერნატორი ქეთი მოისწრაფეშვილი და აჭარის ჯანდაცვის მინისტრის მოადგილე რამაზ ჯინჭარაძე გურიის რეგიონში განსახლებულ ეკომიგრანტ ოჯახებს შეხვდნენ და მათთვის გადაცემული სახლები მოინახულეს.
სამინისტროსა და შვეიცარიის განვითარებისა და თანამშრომლობის სააგენტოს მრავალწლიანი ნაყოფიერი თანამშრომლობის შედეგად, 2014 წლის თებერვალში გაფორმდა საგრანტო ხელშეკრულება, რომლის ფარგლებშიც, ამ ეტაპზე უკვე შესყიდულია 20 საცხოვრებელი სახლი სტიქიით დაზარალებული ოჯახებისათვის.
SDC-ის დაფინანსებით, აჭარის მაღალმთიანი მუნიციპალიტეტებიდან უსაფრთხო გარემოში 20 ეკომიგრანტი ოჯახი განსახლდა, მათ შორის, 15 გურიის რეგიონში. საბიუჯეტო ასიგნებების ფარგლებში, გურიის სოფლებში ეკომიგრანტი ოჯახებისათვის შესყიდულ იქნა დამატებით 8 სახლი. საცხოვრებელი სახლები სტიქიით დაზარელებულმა ოჯახებმა თავად შეარჩიეს.
დღესვე, მინისტრი სოზარ სუბარი ბათუმში, იუსტიციის სახლში, ვაშაყმაძეების ეკომიგრანტი ოჯახისათვის სახლის საკუთრებაში გადაცემის პროცედურას დაესწრო.
“სამინისტროს, SDC-ის, აჭარის მთავრობისა და რეგიონული განვითარებისა და სოციალური დახმარების ცენტრს შორის გაფორმებული ოთხმხრივი ხელშეკრულების ფარგლებში, რეგიონული განვითარების ცენტრმა ეკომიგრანტ ოჯახებს საჭიროებებზე მორგებული პირველადი დახმარება გაუწია. სტიქიით დაზარალებული ოჯახებისათვის შესყიდულ იქნა საქონელი, კარტოფილისა და სხვადასხვა ბოსტნეულის სათესლე მასალა, შესაწამლი აპარატურა, სასუქი, ჩითილის გამოსაყვანი მიწა, საქონლის ასაცრელი პრეპარატები, ფუტკრის სკები, ელექტრო ხერხი, კივის ნერგები და სხვა”, – ნათქვამია განცხადებაში.
2015 წელს SDC-ის დაფინანსებით, ეკომიგრანტი ოჯახებისათვის კიდევ 25 სახლი იქნება შესყიდული. მიმდინარე წელს, სამინისტრო საბიუჯეტო ასიგნებების ფარგლებში, სტიქიით დაზარალებული ოჯახებისათვის 100-მდე სახლს შეისყიდის.