თავდაცვის ყოფილი მინისტრი ირაკლი ალასანია დარწმუნებულია, რომ სამართალი აღსრულდება და ე.წ. “კაბელების საქმეზე“ დაკავებული თავდაცვის სამინისტროს თანამშრომლები ციხიდან გამოვლენ.
“გაერთიანებული დემოკრატების“ ლიდერი გაკვირვებულია, თუ როგორ სძინავთ ივანიშვილს და ღარიბაშვილს მშვიდად, როდესაც უდანაშაულო ადამიანები საპყრობილეში არიან.
“ძალიან მიკვირს როგორ სძინავთ მშვიდი ძილით ივანიშვილს და ღარიბაშვილს, როდესაც უკვე მერამდენე თვეა თავდაცვის სამინისტროს სრულიად უდანაშაულო თანამშრომლები საპყრობილეში არიან. ეს 5 კაცი არის ივანიშვილის პირადი პოლიტიკური ტყვე. ამ პერიოდის განმავლობაში არც ერთი ფაქტი არ გამოვლინდა ისეთი, რომელიც თუნდაც ირიბად მაინც დაადასტურებდა იმ ბრალდებას, რომელიც ყველას ერთად წაგვიყენა ივანიშვილმა რამდენიმე თვის წინ. მე დარწმუნებული ვარ, რომ სამართალი თავის ადგილს იპოვის. დარწმუნებული ვარ, რომ ეს ხალხი გამოვა ციხიდან, დაუბრუნდება საკუთარ ოჯახებს, საკუთარ საქმეს და მერე, ბუნებრივია, დადგება საკითხი პროკურატურის და ივანიშვილის, იმის შესახებ თუ საიდან წამოვიდა ეს ბრალდება და რა ედო საფუძვლად ამ პოლიტიკურ აქტს“,- განაცხადა ალასანიამ.
ცნობისთვის, ე.წ. “კაბელების საქმეზე“ წინასასამართლო სხდომა საქალაქო სასამართლოში დღესაა ჩანიშნული.
Discussion about this post