“სამოქალაქო ჩართულობის ცენტრი”: ,,იდენტობის“ წევრები განზრახ ახდენდნენ დაპირისპირების ხელშეწყობას, რაც ორიენტირებულია გრანტების მოზიდვაზე”

,,სამოქალაქო ჩართულობის ცენტრმა“ 17 მაისის მოვლენებთან დაკავშირებით კვლევა მოამზადა. როგორც კვლევის პრეზენტაციაზე ორგანიზაციის წარმომადგენლებმა განაცხადეს, კვლევაში აღწერილ, აქციაზე განვითარებულ მოვლენებს ორგანიზაციის 10 თანამშრომელი აკვირდებოდა.

კვლევის თანახმად, სხვადასხვა სახის მძიმე და მსუბუქი დაზიანება მიიღო ლგბტ აქციის მოწინააღმდეგე აქციის ათობით წევრმა, მათ შორის არასრულწლოვანმა.

მძიმედ დაზიანდა ერთ–ერთი ჟურნალისტი ხატია კალმახელიძე. ასევე, საშუალოდ მძიმე დაზიანებები მიიღო სამართალდამცავი უწყების წარმომადგენლებმა.

დაზიანდა რამდენიმე კერძო ავტომობილი, სამარშრუტო ავტობუსი, მიკროსამარშრუტო ტაქსი, ქვის ან/და სხვა საზის ნივთების გამიზნული თუ არაგამიზნული სროლის შედეგად დაზიანდა სუპერმარკეტ ,,პოპულის“ ფასადი.

,,სასულიერო პირებისა და მრევლის მიერ 17 მასის აქცია აღქმული იყო ლგბტ პირების პროპაგანდად. პროცესის ესკალაციას ხელს უწყობდა ყოფილი პოლიტპატიმარი, წარსულში რელიგიურ ექსტრემიზმში შემჩნეული გიორგი გაბედავა, რომელიც გამოირჩეოდა დისკრიმინაციული გამონათქვამებით, აგრესიული შეძახილებით და მოწოდებებით, ფიზიკურად გასწორებოდნენ ლგბტ აქტივისტებს“, _ ნათქვამია დასკვნაში და აღნიშნულია, რომ საზოგადოების ეს რეაქცია ბუნებრივია, რადგან მათ დიდ ნაწილს აქვს ნეგატიური დამოკიდებულება ლგბტ პირების მიმართ.

ორგანიზაციაში მიიჩნევენ, რომ ,,იდენტობის“ წევრები განზრახ ახდენდნენ დაპირისპირების ხელშეწყობას, რაც ორიენტირებულია გრანტების მოზიდვაზე და არა რეალურად ამ პირების იდენტობის გაზრდაზე.

,,ვფიქრობთ, რომ დაპირისპირების ესკალაციაში თანაბარი წვლილი მიუძღვის ორგანიზაცია ,,იდენტობას“, აქციაზე მყოფ სასულიერო პირებს, რელიგიური ექსტრემიზმის ნიადაგზე გაერთიანებულ ადამიანებს“, _ აცხადებენ ორგანიზაციაში და საკმაოდ ეფექტურად აფასებენ შსს–ს ღონისძიებას, დაეცვა ლგბტ აქციის მონაწილეები, თუმცა მიიჩნევენ, რომ მეტი სამართალდამცავი პირის მობილიზების შემთხვევაში შესაძლებელი იქნებოდა საზოგადოებრივი წესრიგის უკეთ დაცვა. დასკვნის თანახმად, საბოლოო ჯამში საქართველოში ლგბტ ადამიანის უფლებები იზღუდება მხოლოდ პარადის/აღლუმის ან საჯარო პროპაგანდის პირობებში. რაც შეეხება სამართლებრივ შეფასებას, დასკვნის თანახმად, 17 მაისს დაირღვა კონსტუტუციის 19–ე მუხლი, რომლის თანახმადაც, ყველა ადამიანს აქვს სიტყვის, აზრის, სინდისის, აღმსარებლობის და რწმენის თავისუფლება; დაუშვებელია ამ მუხლში ჩამოთვლილი თავისუფლებების შეზღუდვა, თუ მათი გამოვლინება არ შელახავს სხვათა უფლებებს.

,,17 მაისის შემთხვევაში ლგბტ აქტივისტების მიერ გამართული მანიფესტაცია აბსოლუტურად მშვიდობიან ხასიათს ატარებდა და მათი აზრისა და შეხედულების გამოვლენა არ ლახავდა სხვათა უფლებებს, შესაბამისად მოწინააღმდეგე მხარის მიერ სავარაუდოდ, დაირღვა საქართველოს კონსტუტუციის 19–ე მუხლი“, _ აღნიშნულია დასკვნაში. ორგანიზაცია მიიჩნევს, რომ აქციაში მონაწილე ყველა დამნაშავე პირმა პასუხი უნდა აგოს სათანადოდ  მათ შორის სასულიერო პირებმაც, აღნიშნულ ინფორმაცია დაიბეჭდა  დღეს გაზეთ „ახალ თაობაში“.

20.06.13