ჯანდაცვის საყოველთაო პროგრამაში ჩართვისთვის ბენეფიციარმა ნებისმიერ, მისთვის სასურველ სამედიცინო დაწესებულებას უნდა მიმართოს და რეგისტრაცია გაიაროს.
როგორც საყოველთაო ჯანდაცვის მართვის დეპარტამენტის ხელმძღვანელმა რუსუდან გოგოლაშვილმა აღნიშნა, გეგმიური და ონკოლოგიური დახმარების საჭიროების შემთხვევაში, ბენეფიციარმა გამოკვლევა იმ კლინიკაში უნდა ჩაიტაროს, სადაც მას ამ მომსახურების მიღება სურს. ასევე, აიღოს საჭირო დიაგნოზის პასუხი და ფორმა N100.
ამის შემდეგ, პაციენტი სოციალური სააგენტოს სერვის-ცენტრში (თბილისი, ექსპო ჯორჯიას მე-6 პავილიონში ან რეგიონების სერვის-ცენტრებში) უნდა მივიდეს. ცენტრში მას ხარჯთაღრიცხვისა და კლინიკების შესახებ დეტალურ ინფორმაციას მიაწვდიან. პაციენტი თავად მიიღებს გადაწყვეტილებას, თუ რომელ კლინიკაში სურს ამა თუ იმ მომსახურების მიღება.
ბენეფიციარს გეგმიური ოპერაციების შემთხვევაში, სახელმწიფო 70 %-ით აფინანსებს, ონკოლოგიურ სხივურ-ქიმიოთერაპიას კი – 80 %-ით.
საყოველთაო ჯანდაცვის გაფართოებულ პროგრამაში – 1) ოჯახის ექიმის, ენდოკრინოლოგის, ოფთალმოლოგის, კარდიოლოგის, ნევროლოგის, ოტორინოლარინგოლოგის, გინეკოლოგისა და უროლოგის მომსახურება/კონსულტაცია შედის.
ანაზღაურებადია ასევე, ელექტროკარდიოგრაფია, მუცლის ღრუს ექოსკოპია, გულ-მკერდის რენტგენოსკოპია-რენტგენოგრაფია.
ლაბორატორიულ კვლევებში შედის: სისხლის და შარდის საერთო ანალიზი, გლუკოზა პერიფერიულ სისხლში, კრეატინინი, ქოლესტერინი სისხლში, შრატში ლიპიდების განსაზღვრა, ანალიზი ფარულ სისხლდენაზე, პროთრომბინის დრო, ღვიძლის ფუნქციური სინჯები, ფარისებრი ჯირკვლის თირეოტროპული ჰორმონი.
ყველა აღნიშნული მომსახურება სახელმწიფოს მხრიდან 70-100 %-ით დაფინანსდება.
რაც შეეხება გაფართოებულ ურგენტულ შემთხვევებს, გადაუდებელი ამბულატორიული და სტაციონარული მომსახურება-ლიმიტი ერთეულ შემთხვევაზე 15 000 ლარი, 70-100 %-ით დაფინანსდება.
გეგმიურ ქირურგიულ ჰოსპიტალიზაციასთან (მათ შორის სტაციონარი) დაკავშირებული წინა საოპერაციო, ოპერაციის მსვლელობისას და პოსტოპერაციულ პერიოდში განხორციელებული ყველა ტიპის ლაბორატორიული და ინსტრუმენტული გამოკვლევები 70%-ით დაფინანსდება. წლიური ლიმიტი 15 000 ლარია.
გაფართოებული პროგრამა ითვალისწინებს ონკოლოგიურ დაავადებასთან დაკავშირებულ პროცედურებსაც – დიაგნოსტიკა და მკურნალობა, კერძოდ, ქიმიოთერაპია, ჰორმონოთერაპია და სხივური თერაპია. ასევე, ამ პროცედურებთან დაკავშირებული გამოკვლევები და მედიკამენტები-წლიური ლიმიტი 12 000 ლარი. სახელმწიფოსგან დაფინანსდება 80 %-ით.
სახელმწიფო აფინანსებს ასევე, ფიზიოლოგიურ მშობიარობას – ლიმიტი 500 ლარი, საკეისრო კვეთას – ლიმიტი 800 ლარი.
08.07.13