გარემოს დაცვის სამინისტომ ბოლო სამი თვის განმავლობაში განხორციელებული საქმიანობის ანგარიში წარმოადგინა. გარემოსა და ბუნებრივი რესურსების დაცვის მინისტრმა, ხათუნა გოგალაძემ ანგარიში, სასტუმრო “რედისონში” მინისტრის მოადგილე, ვახტანგ მჭედლიშვილთან, დაცული ტერიტორიების სააგენტოს თავმჯდომარე, რატი ჯაფარიძესთან, სატყეო სააგენტოს თავმჯდომარე, ბიძინა გიორგობიანთან და გარემოს დაცვითი ზედამხედველობის დეპარტამენტის უფროს, ირაკლი მუკნიშვილთან ერთად წარმოადგინა.
ხათუნა გოგალაძის განცხადებით, სამინისტროს სტრუქტურტების გასაძლიერებლად პარლამენტში 50-მდე კანონპროექტი შეიტანეს, შეიქმნა რამდენიმე ახალი სტრუქტურა – ეროვნული სატყეო სააგენტო, გარემოსდაცვითი ზედამხედველობის დეპარტამენტი და კიდევ რამდენიმე ახალი სტუქტურა სამინისტროს ცენტრალურ აპარატში.
მინისტრის თქმით, თვენახევრის განმავლობაში გარემოს დაცვის ზედამხედველობის მიერ კანონდარღვევის 191 ფაქტი გამოვლინდა, მათ შორის რვა სისხლის სამართლის დანაშაულის ნიშნებს შეიცავდა და საგამოძიებო ორგანოებს გადაეცა.
გოგალაძემ ასევე ისაუბრა კანონპროექტებზე, რომელიც მზადდება ნარჩენების მართვის, ასევე ეროვნული სატყეო პოლიტიკის შესამუშავებლად. ატმოსფერული ჰაერის დაცვის მიზნით იქმნება უწყებათაშორისი კომისია, რომელიც პროგრამას შეიმუშავებს ავტოტრანსპორტის მიერ გამონაბოლქვის შესამცირებლად, ერთ-ერთი რეკომედაცია იქნება ავტოპარკის განახლება.
ეროვნული სატყეო სააგენტოს თავმჯდომარე, ბიძინა გიორგობიანმა ტყეების კონტროლის გამკაცრების შესახებ ისაუბრა. მან აღნიშნა, რომ ეს სააგენტო ფაქტობრივად თავიდან იქმნება, 870 ადგილზე თანამშრომლების ასაყვანად ცხადდება კონკურსი. მისივე თქმით, შემუშავდა ტყის აღრიცხვისა და მონიტორინგის წესი, ბორჯომ-ბაკურიანის ტყის 90 000 ჰექტარზე კი ჩატარდება ინვენტარიზაცია.
გიორგობიანმა ასევე აღნიშნა, რომ ბორჯომ-ბაკურიანის ტყის მასივში დაიწყო ხის ქერქიჭამია მწერებისაგან ტყის ფართობების დაცვის სამუშაოები. გიორგობიანის თქმით, ბორჯომ-ბაკურიანში ათასობით ჰექტარი ტყის ფართობი განადგურდა მწერების გამო და მოსახლეობა ამის გამო უკმაყოფილებას გამოთქვამს.
პრესკონფერენციაზე საუბარი იყო ტრავერტინებზეც; დაცული ტერიტორიების თავმჯდომარემ, რატი ჯაფარიძემ აღნიშნა, რომ კობი-გუდაურის გზაზე ტრავერტინების ბუნების ძეგლის სტატუსის მისანიჭებლად სპეციალური კომისია მუშაობდა. ამ ადგილის გარდა ბუნების ძეგლის სტატუსი საქართველოში კიდევ 10 ტერიტორიას მიენიჭება. ჯაფარიძემ ეს ადგილები არ დააკონკრეტა და აღნიშნა, რომ პარლამენტს ამ ადგილების სია ზაფხულის ბოლომდე გადაეგზავნება, რის შემდეგაც მოხდება მათთვის ბუნების ძეგლის სტატუსის მინიჭება.
ჯაფარიძემ ასევე თრუსოს ხეობაში არსებულ ტრავერტინებთან დაკავშირებით ისაუბრა და აღნიშნა, რომ საკითხის შესასწავლად კომისია შეიქმნება, რომელიც დაადგენს უნდა მიენიჭოს თუ არა აღნიშნულ ადგილს ბუნების ძეგლის სტატუსი.
08.07.13
Discussion about this post