„საბანკო სექტორი ჩვენთან საკმაოდ მდგრადი განვითარების ტენდენციებით ხასიათდება, რომლის განვითარების პრიორიტეტებს ტრანსფარენტულობა და კორპორატიული მართვის თანამედროვე პრინციპების დანერგვა წარმოადგენს, ამის შესახებ განაცხადა „თბილისი თაიმსთან“ საუბრისას ბანკების ასოციაციის პრეზიდენტმა ზურაბ გვასალიამ.
მისი განცხადებით, დღეს ეკონომისტებისა და ექსპერტების დიდი ნაწილი თანხმდება იმაზე, რომ საქართველოს ეკონომიკის არც ერთი სხვა დარგი ისე არ არის ახლოს ევროპული ბიზნესის მართვის სტილთან როგორც საბანკო სექტორი.
„ქართული საბანკო სექტორის განვითარების ვექტორი მიმართულია სტაბილური და გრძელვადიანი განვითარების სტრატეგიის ფარგლებში, რასაც მოწმობს ყოველწლიურად ახალი, ინტეგრირებული საბანკო პროდუქტების ბაზარზე გამოტანა და თანამედროვე ტექნოლოგიების დანერგვა. წამყვანი ქართული ბანკებს ყოველწლიურად 10 დან 15 ახალი ინოვაციური პროდუქტი გამოაქვთ ბაზარზე, რაც ცოტა ნამდვილად არ არის.
წამყვანი ქართული ბანკები, ტრადიციულ საბანკო სერვისთან ერთად, სულ უფრო ხვეწენ ონლაინ მომსახურებას, როგორც ინტერნეტ ბანკინგის ასევე მობაილ ბანკინგის პლათფორმებზე. მაგალითად, იმისთვის რომ სესხი მიიღოთ, შეგიძლიათ საერთოდ არ მიხვიდეთ ბანკში და სახლიდან გაუსვლელად შეავსოთ ელექტრონული ფორმა. საინტერესოა ისიც, რომ ელექტრონულად შეგიძლიათ მიიღოთ არა მხოლოდ სამომხმარებლო სესხი, არამედ ისარგებლოთ ონლაინ-განვადებითაც, ხოლო მობილური ტელეფონით გადაიხადოთ კომუნალური გადასახადები, გადარიცხოთ თანხები ან განახორციელოთ ნებისმიერი საბანკო ოპერაცია
ქართული საბანკო სექტორის მდგრად განვითარებას აღიარებს ყველა გავლენიანი საერთაშორისო ორგანიზაცია თუ სარეიტინგო სააგენტო. ძალზე გავლენიანი საერთაშორისო სარეიტინგო სააგენტო Fitch-ის ბოლო შეფასებაც, რომლის თანახმადაც 4 ქართულ ბანკს გრძელვადიანი რეიტინგები დაუდასტურა და სტაბილური პროგნოზი დაუდგინა, ამ თვალსაზრის კიდევ ერთხელ ადასტურებს.
ბოლო წლებში ეკონომიკის ტემპები ხან მაღალი და ხან შედარებით დაბალი იყო, მაგრამ საბანკო სექტორი ყოველთვის ცდილობდა ფეხი აეწყო თანამედროვე ტენდენციებისათვის, ბანკების საქმიანობის ტრანსფარაენტულობა და გახსნილობა, ხელს უწყობდა საბანკო სექტორში უვცოური კაპიტალის, მათ შორის ინვესტიციების უწყვეტ შემოდინებას, ამიტომ მიმაჩნია, რომ საქართველოს შემთხვევაში საბანკო სექტორი იდეალურად არის განვითარებული“, – აცხადებს ზურაბ გვასალია.
15.07.13
Discussion about this post