ქართულ ღვინოსა და მინერალურ წყლებზე ემბარგო მოხსნის შემდეგ, „როსპოტრებნადზორის“ ხელმძღვანელმა გენადი ონიშჩენკომ, პირველი პოლიტიკური მოთხოვნა წამოაყენა: თბილისში ამერიკის მთავრობის დაფინანსებით შექმნილი ბიოლოგიური კვლევების ლაბორატორიის არსებობა „საგრძნობლად შემზღუდველ ზემოქმედებას“ მოახდენს ორმხრივ სავაჭრო ურთიერთობებზე.
20 ივლისს ონიშჩენკომ „ინტერფაქსს“ განუცხადა: „კონტაქტების გაფართოებასთან ერთად, ასევე რუსეთის ფედერაციის ტერიტორიაზე ღვინის, ბოსტნეულის და სოფლის მეურნეობის სხვა პროდუქტების მიწოდების გაფართოებასთან ერთად, სულ უფრო და უფრო გაიზრდება ჩვენი შეშფოთება საქართველოს ტერიტორიაზე აშშ–ის საზღვაო ძალების ბიოლოგიური ლაბორატორიის არსებობასთან დაკავშირებით, რომელიც საქართველოს ხელისუფლების კონტროლს არ ექვემდებარება”.
მისივე განცხადებით ლაბორატორია წარმოადგენს „ძლიერ შეტევით პოტენციალს“ და ეს ბიოლოგიური იარაღის შესახებ კონვენციის პირდაპირი დარღვევაა.
ცნობისთვისაღნიშნული ლაბორატორია აშშ-ის მთავრობამ 150 მილიონი დოლარით დააფინანსა. ის 2011 წელს გაიხსნა და კახეთის გზატკეცილზე მდებარეობს.
ლაბორატორიას რიჩარდ ლუგარის სახელი მიენიჭა იმ ღვაწლისთვის, რომელიც ამერიკელ სენატორს მსოფლიოში ბირთვული, ქიმიური და ბიოლოგიური საფრთხის შემცირების საქმეში მიუძღვის.
ლუგარი საქართველოში 2011 წელს იმყოფებოდა და აღნიშნულ ლაბორატორიასაც ეწვია. მისი ვიზიტის დროს გავრცელებულ პრესრელიზში აშშ–ის საელჩომ თბილისში განაცხადა, რომ ლაბორატორია მიზნად ისახავს „გააძლიეროს და განავითაროს საზოგადოებრივი და ცხოველთა ჯანდაცვა ინფექციურ დაავადებათა აღმოჩენის, ეპიდემიოლოგიური ზედამხედველობისა და კვლევის გზით და ამით სარგებელი მოუტანოს საქართველოს, კავკასიის მთელ რეგიონსა და მსოფლიო საზოგადოებას“.
21.07.13
