„ერთ კვირაში 80 ლექსიც კი დამიწერია“ – ახალგაზრდა პოეტი კოკა კობალაძე

კოკა კობალაძე – ახალგაზრდა პოეტია, რომელიც ფართო აუდიტორიამ ცოტა ხნის წინ გაიცნო და მცირე დროში მოასწრო, რომ შეეყვარებინა. ლექსებს ბავშვობიდან წერდა, მაგრამ საჯაროდ მათი გამოქვეყვება არ უფიქრია. 18 წლის პოეტს, ბევრი გულშემატკივრი ჰყავს. როგორც თავად ამბობს, საქართველოდან წასული თანამემამულეებიც ხშირად წერენ პირად შეტყობინებებში საქებარ სიტყვებს და თავიანთ შთაბეჭდილებებსაც უზიარებან.

თავად, ბიზნესის სფეროში სურს საქმიანობის გაგრძელება და მომავალში საკუთარი თავი საქმიანი იმიჯით წარმოუდგენია. თუმცა ლექსების გამოქვეყნებას კვლავაც  აპირებს, ვინაიდან პოეზია მისი ცხოვრების განუყოფელი ნაწილია.

The Tbilisi Times გაგაცნობთ, კიდევ ერთ ნიჭიერ ახალგაზრდა პოეტს, საინტერესო მიზნებით და ცხოვრებით:

კოკა, როგორია თქვენი მოკლე ბიოგრაფია?

– დავიბადე თბილისში. მყავს ერთი და, ძალიან დიდ პატივს ვცემ ჩემს ბებოსა და პაპას. მშვიდი, გაწონასწორებული, კეთილი ბავშივი ვიყავი, არ მიყვარდა უსამართლობა და პროტესტს ყოველთვის გამოვხატავდი. ბევრი სკოლა გამოვიცვალე და ამჟამად ვარ აბიტურიენტი. ვაპირებ, ჩავაბარო ბიზნესის ფაკულტეტზე, საქმიანი იმიჯი მომწონს, ჰალსტუხიც კი კომფორტულია ჩემთვის.

რამდენად ტრადიციულ ოჯახში იზრდებოდით და მშობლები რა პრინციპებით გზრდიდნენ?

– გამიჭირდება სიტყვებით ავხსნა როგორ მიყვარს ჩემი ოჯახი. ბებო მასწავლებელია და  თავისი მეთოდები ჰქონდა. მიუხედავად იმისა, რომ მკაცრად არ მზრდიდნენ დისციპლინისკენ ყოველთვის მიმითითებდნენ ტკბილი სიტყვით და ეს უფრო მოქმედებდა ჩემზე.

პირველ ლექსზე მომიყევით, პოეზია თქვენს ცხოვრებაში რა როლს თამაშობს?

– პირველი ლექსი ეხებოდა ღირსებას, მორალს. მეორე-მესამე კლასში სამშობლოზეც მქონდა დაწერილი ლექსი. პოეზია ჩემთვის კომუნიკაციის საშულებაა. ლექსებში გამოვთქვამ აზრს, რომლის ირგვლივაც არის განხილვა, ეთანხმებიან, ან პირიქით, აკრიტიკებენ. პოეზია ჩემი ცხოვრების ნაწილია.

როგორ ფიქრობთ, რას ნიშნავს იყო კარგი პოექტი?

– პოეტობა ლამაზი სიტყვა არ არის. პოეტობა – მთელი გულით წერაა, თუნდაც რითმა სულაც არ ჰქონდეს და იყოს ვერლიბრი, ან ჩანახატი, მთავარი გულწრფელობაა.

როგორ გარემოში წერთ ლექსებს, არის პირობა, რომელიც ლექსის დასაწერად აუცილებლად გჭირდებათ?

– ნებისმიერ დროს, ნებისმიერ ადგილას, ნებისმიერ თემაზე  შემიძლია, ვწერო ლექსები. არ მჭირდება განსაკუთრებული გარემო და არც მუზა… ერთ კვირაში 80 ლექსიც კი დამიწერია. ლექსებს შესაბამისი ხასიათისას ვწერ. არ არის აუცილებელი, დეპრესიაში ვიყო და მელანქოლიური განწყობა მქონდეს.

თანამედროვე ქართველი პოეტებიდან ვის გამოარჩევდით?

– ზურა სალუქვაძე მომწონს. თანამედროვე პოეტების შემოქმედებას ვიცნობ, მაინტერესებს რას წერენ, როგორ წერენ. თუმცა გამიჭირდება ვინმეს „აღიარება“, ბევრ მათგანს აქვს პოტენციალი, რომ შემოქმედებითად წინ წაიწიოს.

დღეს ჩვენს ქვეყანაში რამდენად აფასებენ ახალგაზრდა პოეტებს, და აქვთ, თუ არა სამომავლო პერსპექტივა?

– საქართველოში ამ სფეროს ნაკლებად ექცევა ყურადღება, მაგრამ ყველაზე დიდი პერსპექტივა ჩემთვის  საკუთარ თავში წინსვლაა, შემოქმედებითად უფრო მაღალ საფეხურზე ასვლა. მკითხველისგან მოდის ინიციატივა, რომ პოეზიის საღამოები ჩავატარო და მათი სურვილი ჩემი სამომავლო გეგმებია. ადამიანებს, რომლებიც ახალ ლექსებს ელოდებიან არ მინდა იმედები გავუცრუო. ვაპირებ, კრებული გამოვცე და აქტიურად ვიმუშაო ამ მიმართულებით.

როგორია კოკა კობალაძე მეგობრებთან, ახლობელ ადამიანებთან?

– დიდ პატივს ვცემ მეგობრებს და ერთ დიდ ოჯახად მოვიაზრებ. ყოველთვის შემიძლია მივმართო და რჩევა ვკითხო.

რას აკეთებთ თავისუფალ დროს და საერთოდ რამდენად ხშირად ხართ თავისუფალი?

– ვარჯიშით ვარ დაკავებული, გიტარაზე ვუკრავ და ვკითხულობ. მიუხედავად იმისა, რომ აბიტურიენტი ვარ და ბევრი თავისუფალი დრო არ მაქვს, დროის კარგი მენეჯმენტი მეხმარება, რომ დღის განმავლობაში ბევრი რამ მოვასწრო.

რას გრძნობთ, როდესაც კითხულობთ საკუთარ ლექსს?

– საკუთარ ლექსებს ძალიან ხშირად ვკითხულობ, ვუსმენ. მინდა, სხვა თავლით დავინახო და რაც არ მომწონს გამოვასწორო. ჩემს თავს რჩევებს თავად ვაძლევ. ლექსს, რომ ვწერ პირველად აუცილებლად ბებოს ვუკითხავ, ჩემი აზრით, ის ძალიან მაგარი ხელოვანია. როდესაც ვუკითხავ, მთლიანად მთელი სულითა და გულით მისმენს, ყველაფერს აკვირდება და ემოციებს ძირითადად მის თვალებში „ვკითხულობ“ ხოლმე.

საუკეთესო რჩევა რომელიც მიგიღიათ?

– არსებობს ადამიანი, რომლისგანაც მიღებული ყველა რჩევა  ძალიან ძვირფასია, მაგრამ ამჯერად მინდა, რომ მისი ვინაობა ანონიმური დარჩეს.

თუ ხართ გუმანი და რომელი ქვეყნის სამზარეულოს ანიჭებთ უპირატესობას?

– გურმანი საერთოდ არ ვარ, ეს ჩემს გარეგნობაზეც აისახება.

საქართველოში თქვენი საყვარელი ადგილი რომელია?

– წაღვერი დაუფიქრებლად.

რატომ გსურს, რომ ცნობილი იყო?

– უნდა აღვნიშნო,  ჩემი ლექსები არასდროს ყოფილა მოტივი, რომ  პოპულარული გავმხდარიყავი, რადგან დიდი ხანია ვწერ და მხოლოდ ახლა „გამოვჩნდი“.  პოპულარობა საკუთარი მნიშვნელოვანების შეცნობაში მეხმარება. ადამიანების სიყვარული ძალას მაძლევს, საკუთარ მნიშვნელობას შევიგრძნობ ისე, რომ ამით არავინ ზარალდება, ჩემთვის მთავარი ეს არის.

გულშემატკივრებს რას ეტყოდით?

–  ჩემს გულშემატკივრებს ყოველთვის ლექსებით ვესაუბრები. თითოეულ მათგანს ვეტყოდი, რომ არავითარ შემთხვევაში იმედს არ გავუცრუებ. მინდა, რომ თავისუფლად იყვენენ ყოველთვის. არ მოერიდოთ საკუთარი პოზიციის დაფიქსირება, როდესაც  რაიმე არ მოსწონთ გამოხატონ, რომ არ მოსწონთ და, პირიქით, თუ რაიმე მოსწონთ თამამად თქვან, რომ  კარგია მოსწონთ.

ნანუკა მაღლაკელიძე