თბილისის ივანე ჯავახიშვილის სახელობის სახელმწიფო უნივერსიტეტის რექტორი ლადო პაპავა აცხადებს, რომ გამორიცხულია უნივერსიტეტი იყოს პოლიტიკური დაკვეთების შემსრულებელი.
„მეყოფა იმის ძალა, რომ ასეთი რამ უნივერსიტეტში უბრალოდ არ დავუშვა,“ – ამბობს პაპავა.
რექტორმა უნივერსიტეტში დაგეგმილ სიახლეებზეც ისაუბრა. მისი თქმით, უნივერისტეტში ამ ეტაპზე ორი მთავარი ამოცანაა – მიმდინარე და სტრატეგიული.
ლადო პაპავა აღნიშნავს, რომ სასწავლო პროცესი 16 სექტემბერს იწყება და ის უნდა დაიწყოს ხარვეზების გარეშე. რაც შეეხება სტრატეგიულ ამოცანებს, რექტორი ამბობს, რომ უნდა ამაღლდეს ცოდნის დონე. ამ მიზნით ლადო პაპავა აპირებს შეხვედრას ფაკულტეტების ხელმძღვანელებთან, რომლებმაც უნდა წარმოადგინონ გეგმები სახელმძღვანელოებთან დაკავშირებით.
„გეგმაში დეტალური ანალიზი უნდა იყოს წარმოდგენილი იმის შესახებ, თუ რომელ დარგში რა სიტუაციაა, სად არის სახელმძღანელოები და სად არის დეფიციტი, რისგან არის გამოწვეული ეს დეფიციტი. რომელი სახელმძღვანელო უნდა დაიწეროს ქართველი პროფესორის მიერ და რომელი ითარგმნოს. მოსაზრებები უნდა მოდიოდეს დარგის სპეციალისტების მხრიდან, არ ვაპირებ არავის მივცე რჩევა, მაგრამ თუ იქნება შერჩეული რაღაც სახელმძღვანელო სათარგმნად, დარწმუნებული უნდა ვიყოთ რომ ის მართლაც არის საერთაშორისო სტანდარტის და ეს ჩვენ გვჭირდება,“ – აცხადებს ლადო პაპავა.
მისივე თქმით, გარკვეული მიმართულებით დავალება მიეცემა საბიბლიოთეკო ფონდსაც. რექტორი ამბობს, რომ უნივერსიტეტს აქვს კარგი ბიბლიოთეკა, მაგრამ პრობლემები რჩება და სტუდენტები არ არიან კმაყოფილნი. მისივე თქმით, შესაძლებელია ციფრულ ფორმატში სახელმძღვანელოების გადაყვანა, რათა ხელმისაწვდომი იყოს.
გარდა ამისა, ლადო პაპავა გეგმავს პოსტდოქტორანტურის ინსტიტუტის შექმნას, რომლის მიხედვითაც დოქტორანტები, რომლებიც დაიცავენ ხარისხს, შეძლებენ გააგრძელონ საქმიანობა უნივერსიტეტში.
ახალი რექტორი გეგმავს სამეცნიერო-კვლევით საქმიანობაში სტუდენტების ჩართულობის გაძლიერებასაც. ამ მიზნით მაგისტრანტის ან დოქტორანტის ხელძღვანელ პროფესორს ანაზღაურება დაენიშნება. ასევე, უნივერისტეტში ამოქმედდება სააპელაციო სისტემა, სადაც კონკურსის მონაწილე პროფესორს შეეძლება გაასაჩივროს კონკურსის შედეგები. რაც შეეხება საკადრო ცვლილებებს და ახალი კონკურსების ჩატარებას, ლადო პაპავა ამბობს, რომ ეს არ იგეგმება, რადგან რექტორის შევლა არ არის ამის საფუძველი. თსუ-ს რექტორი ამბობს, რომ კონკურსი ჩატარდება მაშინ, როცა ამოიწურება ხელშეკრულების ვადა.
ლადო პაპავა გეგმავს შეხვდეს სტუდენტური თვითმმართველობის წარმომადგენლებსაც. მისივე განცხადებით, უკვე შეხვდა უნივერისტეტის ყოფილ რექტორ ალექსანდრე კვიტაშვილს. გარდა ამისა, ლადო პაპავა აპირებს ჰქონდეს მიღების საათები და შეხვდეს სტუდენტებს, რათა მათ ჰქონდეთ იმის განცდა, რომ მათი ხმა რექტორამდე მისულია.
თსუ-ს რექტორმა ჟურნალისტებთან საუბრისას აღნიშნა, რომ აპირებს 100 დღის შემდეგ ისევ შეხვდეს მათ და შედეგებზე ისაუბროს.
19.08.13
Discussion about this post