სოფლის მეურნეობის სამინისტრომ მეღვინეობის ექპერტებთან შეხვედრა გამართა.
სოფლის მეურნეობის სამინისტროს, მინისტრის პირველი მოადგილე დავით შერვაშიძე და ღვინის ეროვნული სააგენტოს თავმჯდომარე ლევან დავითაშვილი “რთველი – 2013-ის” მოსამზადებელი სამუშაოების ფარგლებში მევენახეობა-მეღვინეობის დარგის ექსპერტებს შეხვდნენ.
შეხვედრაზე რთველის პროგრამული, ტექნიკური და ორგანიზაციული საკითხები განიხილეს, სამომავლო ხედვა და გეგმები განსაზღვრეს. ასევე, დარგის განვითარების პროცესში ექსპერტთა აქტიური ჩართულობის აუცილებლობაზე გაამახვილეს ყურადღება.
დავით შერვაშიძემ აღნიშნა, რომ “რთველი 2013″-ის პროექტების ამოქმედება ინდრუსტრიის მხრიდან მოთხოვნების ანალიზს ეყრდნობა.
,,დღეს, ჩვენ ინდუსტრიას შეგვიძლია შევთავაზოთ რამოდენიმე ინოვაცია, კერძოდ: შეღავათიანი აგროსესხები, სუბსიდიის პროგრამა ვაუჩერის გარეშე, სახელმწიფოს მხრიდან საწარმოებისა და გლეხების ხელშეწყობა თავისუფალი საბაზრო ეკონომიკის პირობებზე გადასვლის მიზნით. რუსეთის ბაზრის გახსნის მიუხედავად, სტრატეგიულად მნიშვნელოვანია ექსპორტი სხვა ქვეყნებში. აღსანიშნავია, რომ გასული წელთან შედარებით, წელს ექსპორტი 43%-ით გაიზარდა. ვაუჩერის გარეშე სუბსიდია გლეხს და მეწარმეს დაახლოვებს, რაც სამომავლოდ ჯანსაღი ბიზნესურთიერთობების საწინდარია”, – განაცხადა მინისტრის მოადგილემ.
“ღვინის ეროვნული სააგენტოს” ხელმძღვანელმა ექსპერტებთან საუბრისას აღნიშნა, რომ ძალზედ მნიშვნელოვანია რთველის დაწყება ყურძნის ფიზიოლოგიური სიმწიფის დადგომიდან.
მისივე თქმით, გლეხის ინტერესი არ უნდა იყოს მარტო ყურძნის ჩაბარება. იგი თავად უნდა იყოს დაინტერესებული ხარისხიანი ღვინის წარმოებაზე და მხოლოდ ამის შემდეგ, შედგება ჯანსაღი ურთიერთობა გლეხსა და მეწარმეს შორის.
,,ასეთი ბიზნესგარემო, გარანტიაა კარგი მოსავლისა და ხარისხიანი ღვინის წარმოებითვის. გლეხმა მეწარმე პარტნიორად უნდა აღიქვას, ხოლო სახელმწიფო მათი იდეოლოგიის მხარდამჭერის როლში უნდა იყოს და არა კონკურენტი და მჩაგვრელი”, – აღნიშნა ლევან დავითაშვილმა.
მისი აზრით, ხარისხის კონტროლი იწყება სწორად ფორმულირებული საინფორმაციო ბაზიდან და იმ მექანიზმების ამოქმედებიდან, რასაც ტექნიკური, ადმინისტრაციული და ადამიანური რესურსების მობილიზება ჰქვია.
ექპერტებთან შეხვედრა ინტერაქტიულ რეჟიმში წარიმართა. იდეებისა და მოსაზრების ურთიერთგაცვლის საფუძველზე, მევენახეობა-მეღვინეობის დარგის განვითარებისათვის სამომავლო მჭიდრო თანამშრომლობა დაიგეგმა.
22.08.13
Discussion about this post