ხობის გამგებელმა, კახაბერ ბენიძემ თანამდებობის დატოვების შესახებ განცხადება დაწერა. ამის მიზეზი კი მისი განცხადებით, ახალი სამსახურია ფინანსთა სამინისტროში.
„მუშაობა დავიწყე ფინანსთა სამინისტროში, შემოსავლების სამსახურში, ერთ-ერთი სამმართველოს უფროსის მოადგილედ“, – განაცხადა ბენიძემ.
ხობის მუნიციპალიტეტის საკრებულოს თავმჯდომარის, მამუკა ქარდავას თქმით, გამგებლის განცხადება თანამდებობის დატოვების შესახებ საკრებულოში გუშინ შევიდა და ის გუშინვე დააკმაყოფილეს.
რაც შეეხება ახალი გამგებლის დანიშვნას, საკრებულოს თავმჯდომარის განმარტებით, გამოცხადდება კონკურსი, რის შესახებაც საკრებულოს ვებ-გვერდზე გამოქვეყნდება.
„ხობში ძალიან ბევრი სამუშაოა შესასრულებელი და გამგებელი აუცილებლად საჭიროა, ამიტომ მომდევნო კვირას ვებ-გვერდზე განთავსდება ყველა პირობა და მსურველები შეძლებენ განაცხადის შემოტანას“, – განაცხადა მამუკა ქარდავამ.
ამჟამად, გამგებლის მოვალეობას, მისი მოადგილე, მახარე ჩოკორაია ასრულებს.
კახაბერ ბენიძე ხობის მუნიციპალიტეტის გამგებლად 2012 წლის 12 დეკემბერიდან მუშაობდა.
23.08.13
Discussion about this post