„ხელისუფლება ისტერიკით ებრძვის „რუსთავი-2“-ის კვლევებს“ – დავით ბაქრაძე

„ხელისუფლება ისტერიკით ებრძვის „რუსთავი-2“-ის კვლევებს და ისტერიკა ყოველთვის სისუსტის და ნერვიულობის ნიშანია. რაც უფრო მივუახლოვდებით არჩევნების დღეს, მით უფრო გამოკრისტალდება ამომრჩევლის ნება. თუ ვინმე კვლევას ვერ იღებს და ვერ ინელებს, ეს მისი პრობლემაა“-ამის შესახებ „ნაცინალური მოძრაობის“ საარჩევნო სიის პირველმა ნომერმა დავით ბაქრაძემ ტელეკომპანია „რუსთავი-2“-ის ეთერში, გადაცემა „შაბათის კურიერში“ ისაუბრა.

„ყველა ვთანხმდებით იმაზე,რომ ამ ქვეყანაში არის მკაფიო ტენდენცია. სამი წლის წინ ოცნების მხარდაჭერა იყო ძალიან მაღალი.  ეს მხარდაჭერა თანდათან იკლებდა და ვარდებოდა ქვემოთ. ტენდენცია,რომ ქართული ოცნების რეიტინგი ვარდება, არის ფაქტი,რომელსაც ვერავინ უარყოფს. მეორე ფაქტი,რომელსაც ვერავინ უარყოფს არის ის,რომ გაზაფხულზე შუალედურ არჩევნებში „ნაციონალური მოძრაობა“ მონაწილეობდა ოთხ ოლქში და ორი მოვიგეთ. აქედან ერთი მოვიგეთ ურთულეს პირობებში, ძალადობის პარალელურად კორცხელში, მეორე კი ნასაკირალში, სადაც ხმების 60% მოვიგეთ.

კვლევების იქით არსებობს საზოგადოების განწყობა. ჩვენი ყველა კანდიდატი ატარებს კამპანიას „კარდაკარ“. ყველა კანდიდატი პირადად შედის ოჯახში ამომრჩეველთან და ამ წუთის მდგომარეობით 200 ათასზე მეტ ოჯახში არიან ნამყოფი პირადად. ამ 200 ათასი ოჯახის ნაწილს „ქართული ოცნების“ გაგონება არ უნდა.

„ქართული ოცნება“  მოწყდა რეალობას ყველაფერში, მათ შორის  ეკონომიკაში და ურცხვად უმტკიცებენ ხალხს, რომ ყველა დაპირება შეასრულეს. მათი ერთადერთი საუბრის თემა სამარცხვინოდ არის დესტაბილიზაცია და არეულობა.  ვერ საუბრობენ ვერც დასაქმებაზე, პენსიების ზრდაზე, ეკონომიკაზე. შემირცხვენია ის მთავრობა ჩიორა თაქთაქიშვილის მოწყობილი ამბოხით რომ აშინებს მოსახლეობას. „ქართული ოცნების“ და მთავრობის გადმოსახედიდან ქვეყანაში ყველაფერი არის კარგად, ქვეყანა გუგუნებს, ქარხნები გრიალებს“

დავით ბაქრაძემ ფინანსთა სამინისტროს მიერ პარლამენტისთვის ახლადწარდგენილი ბიუჯეტის პროექტიც შეაფასა.

„ამ მთავრობის  ბიუჯეტის პროექტი ბოლომდე ასამარებს ამ მთავრობის დაპირებებს. პროექტში არც ერთი თეთრი არ არის ჩადებული სოციალური დახმარებების გასაზრდელად.  არც ერთი თეთრი არ დევს პედაგოგების ხელფასების გასაზრდელად. მთავრობა არ ითვალისწინებს პენსიების გაზრდას არც ერთი თეთრით“.

მანანა ღოღობერიძე