დედის რძე უზრუნველყოფს ახალშობილთა დაცვას სხვადასხვა ინფექციებისაგან. პრაქტიკულად არ ვითარდება ალერგია, ახალშობილი ადვილად ითვისებს დედის რძეს, რასაც გააჩნია ბავშვისთვის საჭირო ოპტიმალური ტემპერატურა. ასეთ შემთხვევაში ჩნდება კითხვა, შეუძლია თუ არა ხელოვნურ დანამატს შეცვალოს ბუნებრივი კვება ისე, რომ არ დააზიანოს ახალშობილის ჯანმრთელობა, უსაფრთხოა თუ არა იმპორტული საკვები ჩვილებისთვის, რამდენად საჭიროა და აუცილებელი ბავშვისთვის ვაქცინის გაკეთება, ამ და სხვა საკითხებზე „თბილისი თაიმსს“ ესაუბრა ციციშვილის სახელობის ბავშვთა ახალი კლინიკის ამბულატორიულ-დიაგნოსტიკური დეპარტამენტის უფროსი, პედიატრიული სამსახურის ხელმძღვანელი, კლინიკა „კურაციოს“ პედიატრიული სამსახურის უფროსი თემურ მიქელაძე.
ბატონო თემურ, ეთანხმებით მოსაზრებას, რომ ბუნებრივი კვება ბავშვისთვის უკეთესია დანამატ კვებასთან შედარებით?
ბუნებრივი კვება ახალშობილისთვის აუცილებელია. მე მაქსიმალურად ვცდილობ შევუნარჩუნო პაციენტებს ბუნებრივი კვება, დამატებით კვებაზე კი გადავდივართ 8 თვის ასაკიდან. დედის რძე შეიცავს დედის იმუნური სისტემის ელემენტებს, მაკრო და მიკრონუტრიენტების, ცილების, ცხიმებისა და ნახშირწყლების ოპტიმალურ რაოდენობას. აღსანიშნავია ისიც, რომ ამის გარდა, დედის რძე ხელს უწყობს ახალშობილის ნაწლავის ნორმალური მიკროფლორის ფორმირებას. ამ ყველაფრის გათვალისწინებით შეიძლება ითქვას, რომ ძუძუთი კვება ახალშობილთა კვების ,,ოქროს სტანდარტია’’. თუმცა საჭიროა ისიც გვახსოვდეს, რომ არსებობს ისეთი შემთხვევიბი, როცა იძულებულები ვხდებით დავუნიშნოთ ხელოვნური საკვები. ესეთი შემთხვევებია: დედის რძის სრულიად არ არსებობა, გულ-სისხლძარღვთა სისტემისა და ღვიძლის ქრონიკული დაავადებები დეკომპენსაციის ფაზაში, დედის ფსიქიკური აშლილობები ( ფსიქოზი, ეპილეფსია, შიზოფრენია), ახალშობილთა ნივთიერებათა ცვლის დარღვევები, ტუბერკულოზის ღია ფორმა, სიფილისი, შიდსი და სხვა შემთხვევები.
დღევანდელი ბაზარი ძირითადად რომელი ქვეყნის ახალშობილის საკვებით არის გაჯერებული?
პრაქტიკულად ყველა ქვეყნის ახალშობილის საკვები მოიპოვება დღევანდელ ბაზარზე, მათ შორის გერმანიის, შვეიცარიის, შვედეთის, რუსეთის, საფრანგეთის და სხვა.
რამდენად უსაფრთხოა იმპორტული საკვები ჩვილებისთვის, თქვენ რომელი ქვეყნის საკვებ პროდუქტს ურჩევთ მშობელს?
შეიძლება ითქვას, რომ ყველა ქვეყნის საკვები ჩვილებისთვის პრაქტიკულად უსაფრთხოა. თუმცა მიმაჩნია, რომ ამდენი სახის საკვები არ უნდა იყოს ქვეყანაში, თუნდაც იმ მიზეზით, რომ ექიმისთვის ძნელია საკვების რჩევა. მე ჩემს პაციენტებს ძირითადად ვურჩევ – ნესტლეს, ჰუმანას და სემპერის პროდუქციას. ამ პროდუქციას აქვს როგორც სამკურნალო, ასევე ადაპტირებული კვება. როდესაც ვსაუბრობთ ხელოვნურ კვებაზე, უნდა ავღნიშნოთ, თუ რა მოთხოვნილებებს უნდა აკმაყოფილებდეს საკვები: გარანტირებული ქიმიური და მიკრობიოლოგიური უსაფრთხოება, ბავშვთა კვების პროდუქციებში მაღალი ხარისხის ნედლეულის გამოყენების აუცილებლობა, არ უნდა შეიცავდეს გენმოდიფიცირებულ პროდუქტებს, საღებავებს, კონსერვანტებს.
ხელოვნურმა დანამატმა ახალშობილში რა დაავადებები შეიძლება გამოიწვიოს?
გამორიცხულია, რომ ახალშობილში ხელოვნურმა დანამატმა გამოიწვიოს დაავადება. რა საკვებიც არსებობს საქართელოში, როგორც ვიცი, ექვემდებარება შემოწმებას. ხელოვნური დანამატი არ უნდა შეიცავდეს ტოქსიკურ ელემენტებს, პესტიციდებს, მავნე მინარევებს და სხვა ისეთ მაჩვენებლებს, რამაც შეიძლება ახალშობილის ჯამრთელობას ავნოს.
ბატონო თემურ, თქვენი ინფორმაციით, ბავშვთა საკვები პროდუქტი სად უფრო შემოწმებულია აფთიაქებში თუ გარე ბაზრობებზე?
რა თქმა უდნა აფთიაქში. აუცილებელია, რომ აფთიაქში სწორად ინახებოდეს საკვები, მომზადდეს ზუსტად იმ კონცენტრაციით, რაც მითითებულია ყუთზე. ასეთ შემთხვევებში პრობლემები არ წარმოიშობა.
თუ გქონიათ ისეთი შემთხვეა, როდესაც პატარა საკვებით მოწამლული მოჰყავთ?
ასეთი შემთვევა, რომ ბავშვი საკვებით მოწამლულიყო პრაქტიკაში არ მქონია. თუმცა იყო შემთხვევები, როცა მშობელს არასწორად მოუმზადებია საკვები და ამას გამოუწვევია პრობლემები. აქვე ავღნიშნავ, რომ დამატებითი საკვები მიზანშეწონილია რაციონში დაემატოს თანდათანობით და მზარდი დოზებით. პირველად აუცილებელია ერთი სახეობის საკვების მიღება. ასევე დამატებით კვების დროს დაცული უნდა იყოს ქიმიური, ეკოლოგიური და მიკრობიოლოგიური უსაფრთხოება, ასევე ჰიპოალერგიულობა. როდესაც მშობელი იყენებს დამატებით კვებას, მას უნდა ახსოვდეს, რომ დამატებით კვებათა შორის აუცილებელია საათობრივი რეჟიმის მკაცრი დაცვა, არანაკლებ 3, 5,4 საათისა. კვებათა შორის დასაშვებია წახემსება 1-2-ჯერ დღეში. შემიძლია ავღნიშნო, რომ არ არის რეკომინდირებული ბავშვისთვის ორი ან მეტი საკვების ერთდროულად მიცემა,ასევე არ არის მიზან შეწონილი 12 თვის ასაკამდე ძროხის რძის გამოყენება, რადგან იგი იწვევს რკინის შეწოვის შეფერხებას და ანემიას, არ შეიძლება ბავშვის საკვებისთვის მარილის ან შაქრის დამატება.
უკვე ზაფხული გადის, მოდის შემოდგომა, შემდეგ კი ზამთარი – ვირუსის საწინააღმდეგო რძჩვეას ხოლო არ მისცემდით ახალშობილის მშობლებს, რამდენად საჭიროა და უსაფრთხოა ბავშვისთვის ვაქცინის გაკეთება?
ვირუსული ინფექციებისგან დაცვა არის ძალიან რთული. სასურველია, რომ მშობელმა 1 წლამდე ასაკის ბავშვი აარიდოს ხალხმრავალ ადგილებს. არ არის რეკომინდირებული სკოლამდელ დაწესებულებებში ბავშვის წაყვანა, როცა იგი ავად არის, სახლის პირობებშიც მაქსიმალურად იზოლირებული უნდა იყოს. ბავშვმა უნდა მიიღოს სრულფასოვანი, მინერალებით გაჯერებული საკვები. სამწუხაროდ, ჩვენს საზოგადოებაში არსებობს მოსაზრება, რომ არსებობს სხვადასხვა ვაქცინები, არსებობს გრიპის ვაქცინა. უნდა ვიცოდეთ, რომ აცრა უკეთდება გარკვეული ჯგუფის პაციენტებს, ესენი არიან – ორ წლამდე ასაკის ბავშვები, 2-დან 5-მდე ბავშვები, რომლებსაც აქვთ სასუნთქი სისტემის პათოლოგია და სხვა პრობლემები. ხშირად მშობლებს მიაჩნიათ, რომ გრიპის ვაქცინა დაიცავს ბავშვს სხვა ვირუსული ინფექციებისაგან, 90 პროცენტში ინფექციები არის სეზონური, ხოლო გრიპის ინფექცია მხოლოდ 10 პროცენტში გვხვდება. ვაქცინა იცავს მხოლოდ გრიპის – A, B, C ტიპის ვირუსებისგან, რომლის საწინააღმდეგოდაც არის ასეთი ვაქცინები შემუშავებული.
29.08.13
მარინა ფიდუაშვილი
Discussion about this post