თბილისის სასწრაფო-სამედიცინო დახმარების მძღოლები საპროტესტო აქციების გამართვას აპირებენ. ამის შესახებ სასწრაფო-სამედიცინო დახმარების მძღოლებმა და ტრანსპორეტის პროფკავშირების თავმჯდომარემ განაცხადეს.
ლავრენტი ალანიამ ჟურნალისტებს არსებული პრობლემების შესახებ ინფორმაცია მიაწოდა.
მისი ინფორმაციით, სასწრაფო დახმარების მძღოლებს მორიგეობა სამ დღეში ერთხელ უწევდათ და მინიმალური ანაზღაურების სახით, 850 ლარს იღებდნენ. ახლა კი, მძღოლები ხელმძღვანელობის გადაწყვეტილებით, ოთხ დღეში ერთხელ მორიგეობენ, მათი ხელფასები კი 480 ლარამდე შემცირდა.
აღნიშნულის გამო, სასწრაფო დახმარების 280-მა მძღოლმა საინიციატივო ჯგუფი შექმნა, რომლებიც საკუთარ მოთხოვნებს წერილობითი ფორმით სასწრაფო დახმარების უფროსს, შალვა ბრაჭულს წარუდგენენ.
საინიციატივო ჯგუფის ხელმძღვანელის, დავით სებუას თქმით კი, მძღოლების საქმე ისეთივე საპასუხისმგებლოა, როგორიც ექიმების, რადგან პაციენტისა და ექიმების უსაფრთხოდ და სწრაფად გადაყვანაზე პასუხისმგებელნი სწორედ მძღოლები არიან.
მძღოლების ინფორმაციით, იმ შემთხვევაში თუ მათი ხელფასები არ გაიზრდება და მინიმალური ანაზღაურება 850 ლარი არ გახდება, ისინი მომავალი კვირიდან საპროტესტო აქციებს დაიწყებენ და მათთან ერთად ქუჩაში, მათი ოჯახისწევრებიც გამოვლენ; გამოძახებაზე არგასვლაზე პასუხისმგებლობას კი, ტრანსპორტის პროფკავშირის წარმომადგენლები, შალვა ბრაჭულს აკისრებენ.
სასწრაფოს მძღოლები დახმარებისათვის თბილისის მერიასა და საკრებულოს მიმართავენ.
05.09.13