საქართველოს რეგიონული განვითარებისა და ინფრასტრუქტურის მინისტრმა დავით ნარმანიამ გორის რაიონის სოფელ სკრაში მიმდინარე ნაპირსამაგრი სამუშაოები დაათვალიერა.
მდინარე მტკვრის კალაპოტის სანაპირო ზოლში ეწყობა 260 მეტრი სიგრძისა და 5720 კვ.მ მოცულობის ქვანაყარი ბერმა, რომელიც ეროზიულ მიწას ჩარეცხვისგან დაიცავს.
სამუშაოები სოფლის მოსახლეობის კოლექტიური წერილის საფუძველზე დაიწყო. ვითარების შემოწმებით დადგინდა, რომ წყალმოვარდნების პერიოდში, ინტენსიურად ირეცხებოდა მდინარის მარჯვენა ნაპირი, სადაც საცხოვრებელი სახლები და ნაკვეთები მდებარეობდა. სოფლის მაცხოვრებლის, რუსუდან დოკაძის თქმით, კალაპოტიდან გადმოსული წყალი მთლიანად ტბორავდა დასახლებას, ანადგურებდა შინაურ ფრინველებსა და ცხოველებს, მოსავალს. ახლა დიდი საქმე კეთდება, – თქვეს სკრის მცხოვრებლებმა, – და, თუ ეს პროექტი კიდევ გაგრძელდება, ჩვენი პრობლემა საბოლოოდ მოგვარდება.
რეგიონული განვითარებისა და ინფრასტრუქტურის მინისტრი პროექტის გაგრძელებას არ გამორიცხავს. „სკრის მოსახლეობას მნიშვნელოვანი პრობლემა უგვარდება, თუმცა, სოფლის მეორე ნაწილი ითხოვს, ანალოგიური ნაპირდაცვის პროექტი დამატებით მონაკვეთზეც გაგრძელდეს,“ – განაცხადა დავით ნარმანიამ, – „ჩვენ შევისწავლით ამ საკითხს, მომავალი წლის პროექტების განაწილების დროს განვიხილავთ და, ალბათ, დადებითადაც გადავწყვეტთ, რადგან პრობლემა აუცილებლად ბოლომდე უნდა მოგვარდეს.“ ამ საკითხის შესახებ მინისტრი სკრის მოსახლეობას სამუშაოების დათვალიერების დროს ესაუბრა.
„ვინაიდან ჩვენ ნაპირდაცვის პროექტები წელს ერთ-ერთ მნიშვნელოვან პროექტებადგამოვაცხადეთ, ამ მხრივ ვითარება გვარდება, თუმცა, მომდევნო წლისთვისაც რჩება საკმაოდ მნიშვნელოვანი სამუშაოები. ამიტომ, პარალელურ რეჟიმში ვსწავლობთ იმ ადგილებს, სადაც მომდევნო წლებში ინფარსტრუქტურა აუცილებლად უნდა მოწესრიგეს, რათა პრობლემები, რომელიც მოსახლეობას აწუხებს, საბოლოოდ გადაწყდეს და ყველა პროექტი მათ კეთილდღეობისკენ იქნას მიმართული,“ – აღნიშნა მინისტრმა.
საავტომობილო გზების დეპარტამენტის თავმჯდომარის მოადგილის, გიორგი ამაშუკელის ინფორმაციით, ნაპირსამაგრი სამუშაოები აქტიურად მიმდინარეობს და დღეისთვის მათი 70% შესრულებულია. კონტრაქტორი ფირმა, სამუშოების ტემპებიდან გამომდინარე, პროექტის მთლიანად დასრულებას დაგეგმილზე ადრე – ოქტომბერში აპირებს.
09.09.13