ქართულ ბაზარზე ახალი ქართული ბრენდი გამოჩნდა „გამარჯობა“, რომელიც მომხმარებელს სთავაზობთ ნატურალური ქართული პროდუქციით დამზადებულ ფელამუშს, სხვადასხვა ჩირითა და კაკლით. ბიზნესი სამმა მეგობარმა ალეკო ზარნაძემ, ბექა ქათამაძემ და ირაკლი გოგილიძემ ერთად დაიწყეს. პროდუქტს მათ საოჯახო მარანში ამზადებენ. „თბილისი თაიმსს“ ბრენდის ერთ-ერთი დამფუძნებელი ალეკო ზარნაძე ესაუბრა ფელამუშის შექმნისა და სამომავლო გეგმების შესახებ.
„ფელამუში დაახლოებით სამი თვის წინ შეიქმნა.იდეა გაჩნდა იქიდან, რომ როგორც მოგეხსენებათ, ქართულ ბაზარზე არსებობდა მხოლოდ ჩურჩხელა და ნაკლებად იყო წარმოდგენილი ფელამუში. ამიტომ გადავწყვიტეთ, გვეწარმოებნა ფელამუში, რომელიც ბევრად გემრიელი და ყველასთვის საყვარელი საჭმელია.“
როგორც კომპანიის დამფუძნებელი აღნიშნავს ფელამუში „გარაჯობა“ მზადდება სიმინდისა და ხორბლის ფქვილისგან , დანამატი არის ქლიავისა და გარგარის ჩირები, ასევე მზადდება თხილისა და კაკლისგან.
„უპირატესობა გვაქვს ის, რომ ჩვენი პროდუქტი არის ფერმენტულად დაცული, შეფუთულია მინის ქილაში. ასევე ჩვენს შეფუთვას მოჰყვება კოვზი, რაც საშუალებას აძლევს ჩვენს მომხმარებელს,ნებისმიერ ადგილას მიირთვას ფელამუში „გამარჯობა“.
ფელამუშის შეძენა შესაძლებელია თბილისის ცენტრალურ უბნებში და ტურისტულ ზონებში.
„რაც შეეხება რეგიონებს ჯერჯერობით მხოლოდ ქუთაისში იყიდება ჩვენი პროდუქცია ღვინის ბარში. ასევე ამ ეტაპზე მოლაპარაკებები მიმდინარეობს სხვადასხვა კომპანიასთან და მალე ჩვენი ბრენდი წარმოდგენილი იქნება კიდევ სხვა რეგიონებშიც.“
როგორც ალეკო ზარნაძე აცხადებს, პროდუქტი უვნებელია, 100 პროცენტით ნატურალური, არის ანტიდეპრესანტი, გონების გამაძლიერებელი და აქვს სხვა კიდევ ბევრი დადებითი თვისება.რაც შეეხება შენახვის ვადას, როგორც დამფუძნებელი განმარტავს ფელამუშის შენახვა აქვს ჯერჯერობით ერთი თვის განმავლობაშია შესაძლებელი.
„სამომავლოდ ვაპირებთ, რომ ცოცხალ ხილზე გადავიდეთ და პროდუქცია სხვადასხვა სახის ცოცხალი ხილისგან დავამზადოთ. მთლიანად მომხმარებლის სურვილზე და მოთხოვნაზე იქნება დამოკიდებული, თუ რა სახის ხილი სურთ მათ რომ მირთვან ფელამუშთან ერთად.“
მარიამ ლეკიაშვილი
Discussion about this post