მარჯვენასაჭიანი ავტომობილის ტექდათვალიერების შემდეგ, ამ მანქანაზე საჭის მარცხნივ გადატანა აკრძალული იქნება. ამის შესახებ ეკონომიკის სამინისტროს სსიპ “სახმელეთო ტრანსპორტის სააგენტოს” დირექტორმა, მიხეილ ხმალაძემ განაცხადა.
როდესაც ასეთი მანქანა მეორედ მივა ტესტირებაზე და მას საჭე მარცხენა მხარეს ექნება გადატანილი, სავალდებულო ტესტირებას ვეღარ გაივლის.
“ეს მანქანები სხვა პარამეტრებზე ტესტირებას ჩვეულებრივად გაივლიან, მაგრამ რაც შეეხება საჭის მექანიზმს, ჩვენ შევამოწმებთ და თუ ძალიან ცუდი მდგომარეობა არ არის, მაშინ სავალდებულო ტექნიკურ ინსპექტირებას ჩვეულებრივად გავატარებთ. თუ რაიმე პრობლემა იქნება, ამ შემთხვევაში დროს მივცემთ, რომ მინიმალურად მაინც გამოასწორონ “, – განაცხადა ხმალაძემ.
მკითხველს შევახსენებთ, რომ ავტოსატრანსპორტო საშუალებების სავალდებულო ტექნიკური ინსპექტირება 2018 წლის 1 იანვრიდან დაიწყება და ის ეტაპობრივად განხორციელდება. მომსახურება, სავარაუდოდ, 60 ლარი ეღირება.
ნინო ზარიძე