“განსაკუთრებული ჩავარდნა ქვეყანას ადამიანური კაპიტალის და კვლევების განვითარების საკითხებში აქვს” – DBR-ს საერთაშორისო კვლევის ექსპერტული ანალიზი

პარლამენტის ეროვნული ბიბლიოთეკის საკონფერენციო დარბაზში, Doctrina Business Review-მ პრეზენტაცია-ფორუმი თემაზე „გლობალური ინოვაციების ინდექსი და საქართველო“ გამართა. პრეზენტაციაზე ორგანიზაციების Cornell University, INSEAD და World Intellectual Property Organization (WIPO) მიერ მომზადებული კვლევის „გლობალური ინოვაციის ინდექსი 2013“-ის შედეგები იყო განხილული და ასევე საქართველოს მდგომარეობა მსოფლიო ინოვაციური განვითარების რეიტინგში. კვლევაში მსოფლიოს 142 ქვეყნის ინოვაციური განვითრების მახასიათებლები იყო წარმოდგენილი. „დღევანდელი ინდექსი იყო გლობალური ინოვაციების ინდექსის საფუძველზე ჩამოყალიბებული. რეიტინგში 142 ქვეყანას შორის, 73 ადგილს ვიკავებთ, წინა წელს 71 ადგილზე ვიყავით.  როგორც კვლევამ აჩვენა, განსაკუთრებული ჩავარდნა ქვეყანას აქვს ადამიანური კაპიტალის და კვლევების განვითარების საკითხებში“. – აღნიშნა DBR-ის დირექტორმა მიხეილ დუნდუამ. „გლობალური ინოვაციის ინდექსი 2013“-ის მიხედვით ინოვაციური სახელმწიფოების პირველი ათეული ასე გამოიყურება:

1. შვეიცარია
2. შვედეთი
3. გაერთიანებული სამეფო
4. ნიდერლანდები
5. ამერიკის შეერთებული შტატები
6. ფინეთი
7. ჰონკონგში (ჩინეთი)
8. სინგაპური
9. დანია
10. ირლანდია

„ვფიქრობ შესაბამისმა ინსტიტუტებმა საგულისხმოდ უნდა მიიღონ  კვლევის შედეგები და განსაკუთრებული ყურადრება მიექცეს  სახელმწიფოსგან და შესაბამისი ინსტიტუციებისგან, იმ მიმართულებებს, სადაც ჩვენს ქვეყანას სუსტი პოზიცია გააჩნია. დღევანდელი პრეზენტაცია არის ძალიან კარგი, მისასალმებელი და მხარდასაჭერი.“– აღნიშნა ექსპერტმა სლავა ფეტელავამ.

გლობალური ინოვაციის ინდექსი მრავალ პარამეტრს და ინდიკატორს მოიცავს, რომელიც თავის მხრივ სხვადასხვა რეიტინგების წარმოების საშუალებას იძლევა. რეიტინგში საქართველოს ყველაზე ცუდი შედეგი შემდეგი მიმართულებით დაუფიქსირდა:

მიმდინარე ხარჯები განათლებაზე-109-ე პოზიცია
კაპიტალი და კვლევები-97
ISO14001 ეკოლოგიური სერტიფიკაების გავრცელების დონე-119
ადგილობრივი კონკურენციის ინტენსივობა-123
ცოდნის გავრცელება ქვეყნის მაშტაბით-118
პოლიტიკური სტაბილურობა-111
უნივერსიტეტების და ინდუსტრიის თანამშრომლობა კვლევების სფეროში-126

საქართველოს მეზობელს ქვეყნებს შორის ყველაზე უარესი მდგომარეობა აქვს, რაც საბოლოო ჯამში უაღრესად კრიტიკული და საგულისხმო დასკვნების გამოტანის საშუალებას იძლევა.

  „საქართველოს მდგომარეობა ამ რეიტინგში არის სავალალო, ძალიან ცუდი, მაგრამ ეს არაფერს არ ნიშნავს, ყველაფერს აქვს განვითარება და ჩვენ ისე უნდა მოვახერხოთ, რომ  ამ ცუდი მდგომარეობიდან ნელ-ნელა გავაუმჯობესოთ მდგომარეობა და ერთ-ერთი მეცნიერული ქვეყანა გავხდეთ, ჩვენ ქართველებს შეგვიძლია ეს და ამის საშუალება გვაქვს. უბრალოდ გარკვეული წლები ჩვენ დავკარგეთ და ეს წლები სამწუხაროდ ისე დაიკარგა, რომ ნგრევის მეტი არაფერი კეთდებოდა  და  ამ რეიტინგებშიც არის ასახული ეს ყველაფერი“. – განაცხადა სტრატეგიული განვითარების სააგენტოს დირექტორმა ნოდარ ძიძიკაშვილმა.