„ „ნაციონალური მოძრაობის“ დროს შექმნილი კოორდინატორების სისტემა და ჩვენი პარტიული აქტივი განსხვავდება ერთმანეთისგან. როდესაც პარტიული აქტივი მუშაობს ხმების მობილიზაციაზე, ამაში ამორალური და მითუმეტეს უკანონო არაფერია. ყველაზე მეტი რაც შეიძლებოდა ყველაზე კრიტიკულ ადამიანს დაეფიქსირებინა, იყო ის,რომ ადამიანები აკვირდებოდნენ ამომრჩევლების რაოდენობას,პირად მონაცემს ვერავინ ჩაიწერდა “, – ამის შესახებ „ქართული ოცნების“ საპარლამენტო უმრავლესობის თავმჯდომარემ, მამუკა მდინარაძემ „ტვ პირველზე“, გადაცემა „დიანა ტრაპაიძის დღის ამბების“ ეთერში ისაუბრა.
„კახი კალაძე უფლებამოსილების განხორციელებას ნოემბრის შუა რიცხვებიდან შეუდგება. ის მილოცვას იღებს არაერთი ევროპელი პარტნიორისგან, ასევე ჩვეულებრივი რიგითი ადამიანებისგან. ეს არის უპრეცედენტოდ მაღალი საარჩევნო ბარიერი და უდიდეს ლეგიტიმაციას აკისრებს გამარჯვებულ კანდიდატს. ევროპელები გაკვირვებასაც გამოხატავენ ამ ბარიერის გამო. ჩვენივე თავს დავუწესეთ მაღალი კონტროლი და ამით ლეგიტიმაციის ხარისხი გავზარდეთ. მე კიდევ უფრო მაღალი მაჩვენებლის იმედი მქონდა.
ყოველგვარი აგრესიული ელემენტებისგან გაიწმინდა წინასაარჩევნო კამპანია. თუ წინა არჩევნებში შეინიშნებოდა მკაცრი პასუხი ოპონენტების მოგონილ დღის წესრიგზე, ახლა არც კი გვიხსენებია ოპონენტების სახელები და გვარები. აბსოლუტურად პოზიტივზე და მომავლის ხედვაზე იყო აგებული წინასაარჩევნო კამპანიის 99 %.
ბიძინა ივანიშვილი ამ არჩევნებში მაინცდამაინც არ ჩაერია. ის წავიდა პოლიტიკიდან და ალბათ საგანგებოდაც არჩია დისტანცირება,რომ კითხვები არ დასმულიყო საზოგადოებასა და ჟურნალისტებში. ის აგრძელებს თავის წარმატებულ საქმიანობას,რასაც ებრძვიან. მას სურს,რომ დამატებითი კითხვები არ გაჩნდეს და პარტიამ თავისუფლად, არგუმენტების და მტკიცების გარეშე შეძლოს წარმატება“ , – განაცხადა მამუკა მდინარაძემ.
მანანა ღოღობერიძე