ნუცუბიძის ქუჩაზე გარდაცვლილი ახალგაზრდას, პაატა პავლიაშვილის საქმეზე პარლამენტის ადამიანის უფლებათა დაცვის კომიტეტის თავმჯდომარემ, სოფო კილაძემ „ტვ პირველზე“, გადაცემაში „დიანა ტრაპაიძის დღის ამბები“ ისაუბრა.
„თემა არის სენსიტიური იმ კუთხით,რომ ფიგურირებენ პოლიციელები და ამ ფაქტს სჭირდება ბევრი ნაბიჯი,რომ დადგინდეს სიმართლე. საქმის მგრძნობელობიდან გამომდინარე საჭიროა ყველა დავაკვირდეთ პროცესს და საბოლოო დასკვნა როდესაც დაიდება შემდეგ შეგვიძლია შეფასებები. მქონდა კომუნიკაცია შესაბამის ორგანოებთან, იმისათვის,რომ სპეკულაციები დასრულდეს.
შევწუხდი ოპოზიციური პარტიების მხრიდან გაკეთებული კომენტარებით, არღვევენ უდანაშაულობის პრეზუმფციას, რაც არასწორი და არაადეკვატურია. ადამიანური ტრაგედიები არ შეიძლება ვიწრო პოლიტიკური მიზნებისთვის გამოიყენოს ადამიანმა. ეს არაკანონიერების გარდა ამორალურიცაა. ჩემი ინფორმაციით პოლიციას სამხრე კამერების ჩანაწერები აქვს და იმედი მაქვს რომ შესაბამისი ორგანოები გამოაქვეყნებენ ამ ჩანაწერებს მაღალი საზოგადოებრივი ინტერესიდან გამომდინარე.
თუ ჰქონდა სამართალდარღვევას ადგილი ესეც დადგინდება. ჩემი ინფორმაციით,როდესაც ახალგაზრდა გარდაიცვალა, ბორკილები მას აღარ ჰქონია. პოლიციამაც მიმართა 112-ს და გამოიძახა სასწრაფო დახმარება. სამართალდამცველებმა შეაფასეს სიტუაცია და თავად დარეკეს დახმარებისთვის, მაგრამ გასარკვევია რა დროს მოხდა ეს, დააგვიანეს თუ არა“ , – განაცხადა სოფო კილაძემ.
მანანა ღოღობერიძე
Discussion about this post