საქართველოში სპორტის უამრავი სახეობაა განვითარებული და გავრცელებული. ჩვენი სპორტსმენებიც საქართველოსა და მსოფლიოს სხვადასხვა კუთხეში მოღვაწეობენ. ძალისმიერი სამჭიდი სპორტის ის სახეობაა, რომელიც საკმაოდ განვითარებული და აღიარებულია მსოფლიოს სხვადასხვა ქვეყანაში. ჩვენი დღევანდელი რესპონდენტი ძალისმიერი სამჭიდის ერთ-ერთი წარმატებული წარმომადგენელი, საქართველოსა და მსოფლიოს მრავალგზის ჩემპიონი ნოდარ ტატიშვილია. ნოდარი ამჟამად ამერიკაში მოღვაწეობს და ცდილობს წარმატებას უკვე საქართველოს ფარგლებს გარეთ მიაღწიოს. ,,თბილისი თაიმსი“ დაუკავშირდა ნოდარ ტატიშვილს და კარიერასა და სამომავლო გეგმებზე ესაუბრა.
ნოდარ, მოგვიყევით თქვენ შესახებ. როდის და სად დაიწყო თქვენი კარიერა?
– სპორტული კარიერა 2009 წელს დავიწყე როგორც პროფესიონალმა სპორტსმენმა. მანამდე ყოველთვის როგორც მოყვარული ისე ვვარჯიშობდი. მეგობრების რჩევით მივმართე ათლეტიზმის ფედერაციას, რადგან გამოვირჩეოდი ფიზიკური ძალით და მონაცემები ხელს მიწყობდა. ფედერაციის პრეზიდენტი და მთავარი მწვრთნელი ჩემით დაინტერესდნენ და ამ პერიოდიდან იწყება უკვე პროფესიონალური სპორტული კარიერა.
დღეს ამერიკაში მოღვაწეობთ. რა გახდა მიზეზი, რომ წასულიყავით კარიერის გასაგრძელებლად ა.შ.შ-ში? რა შემოთავაზებები გაქვთ დღეს…
– ამერიკაში ერთი წლის წინ ჩამოვედი. უმთავრესად სპორორტულმა ინიციატივამ დამაინტერესა. რა თქმა უნდა, ოჯახური მდგომარეობიდან გამომდინარეც ასე უკეთესი იყო ჩემთვის. ჩვენს ქვეყანაში, სამწუხაროდ, არაოლიმპიურ სპორტის სახეობებს დიდი ყურადღება არ ექცევა. აქედან გამომდინარე, დაფინანსებასთან დაკავშირებით სულ პრობლემებია. მე და ჩემს ოჯახს რაც შეგვეძლო, ყველაფერი გავაკეთეთ და როცა მივხვდი, რომ საკუთარი რესურსი საქართველოში ამოვწურე და ჩემთვის სასურველი შედეგი ვერ მივიღე, გადავწყვიტე წავსულიყავი, რადგან აქ მეტი პერსპექტივაა. რაც შეეხება შემოთავაზებებს, ჯერ გავიმარჯვე ადგილობრივ ჩემპიონატზე. ახლა ვემზადები მსოფლიო ცემპიონატისთვის და ვიმედოვნებს, რომ ამ შეჯიბრებაზე გამარჯვება კარგი სტარტი იქნება ჩემი სპორტული კარიერისათვის.
ამერიკაში 2011 წელსაც იყავით, როდესაც გახდით ჩემპიონი. მოგვიყევით ამ წარმატების შესახებ…
– 2011 წელს საქართველოს ნაკრებთან ერთად ვიყავი ამერიკაში მსოფლიო ჩემპიონატზე, სადაც მონაწილეობას იღებდა ხუთი ქართველი სხვადასხვა წონით კატეგორიაში. ეს იყო ჩემი პირველი ასპარეზობა მსოფლიო ჩემპიონატზე, სადაც გამარჯვება მოვიპოვე ახალგაზრდეს შორის და დავამყარე მსოფლიო რეკორდი. ასევე მოვახერხეთ და გუნდური პირველობაც დავისაკუთრეთ, რაც დიდი წარმატება იყო ჩვენთვისაც და ფედერაციისთვისაც. ამასთან ერთად, უდიდესი სიხარული და წარმატება იყო ის, რომ საუკეთესო სპორტსმენის თასი დავიმსახურე. რაც შეეხება ემოციებს, რა თქმა უნდა, ეს დიდი სიხარული იყო ჩემთვის პირველივე ასპარეზობაზე, მსოფლიო ჩემპიონატზე ასეთი შედეგების მოპოვება ძალიან სასიამოვნოა. ძალიან ვამაყობდი იმით, რომ ქართველი ვიყავი და ჩემს ქვეყანას კიდევ ერთი საერთაშორისო აღიარება და წარმატება მოვუტანე.
ვიცით, რომ საქართველოსა და ევროპის მრავალგზის ჩემპიონი ხართ. თუ შეგიძლიათ ქრონოლოგიურად მოგვიყვეთ თქვენი წარმატებები.
– დიახ, საქართველოს შვიდგზის ჩემპიონი ვარ. 2011 წელს მსოფლიო ჩემპიონი ახალგაზრდებში და მსოფლიო პრიზიორი დიდებში. ასევე, მსოფლიო ჩემპიონი გუნდურ პირველობასა და საუკეთესო სპორტსმენის თასის მფლობელი. 2013-2014 წლებში საერთაშორისო ჩემპიონატის პრიზიორი. 2015 წელს ევროპის საუკეთესო თასის ვერცხლის მედალოსანი და საუკეთესო სპორტსმენის მესამე ადგილი პრიზიორი. 2017 წელს ამერიკის ქალაქ ნიუ-ჯერსის ჩემპიონი.
ნოდარ, გვესაუბრეთ თქვენს ოჯახზე. მათ რა წვლილი შეიტანეს თქვენს კარიერაში? როგორი იყო მათგან ხელშეწყობა.
– ჩემი ოჯახი მაქსიმალურად იყო ჩართული ჩემს სპორტულ ცხოვრებაში და ახლაც ცართულია. საბედნიეროდ, მყავს დედა და და, რომლებმაც დიდი წვლილი შეიტანეს ჩემს წარმატებაში. რომ არა ისინი, მე ასეთ დიდი წარმატებას ვერ მივაღწევდი. ძალიან რთული და დიდი სიძნელეები გადავლახეთ ერთად, ერთმანეთის გვერდში დგომით. მათ ფაქტობრივად ჩემი ცხოვრებით იცხოვრეს იმ წლებში, როდესაც მე საქართველოში ვვარჯიშობდი. კიდევ ძალიან დიდი წვლილი შეიტანეს ჩემმა მეგობრებმა ჩემს წარმატებაში და მადლობა მათ ამ სიყვარულისა და გვერდში დგომისათვის.
რას ნიშავს თქვენთვის სამჭიდი?
– სამჭიდი ჩემი ცხოვრების განუყოველ ნაწილად იქცა. ეს არის სპორტი რომელსაც, როგორც ყველა სპორტის სახეობას, დიდი გამძლეობა, მოთმინება ნებისყოფა და შრომა სჭირდება. მე მიყვარს ჩემი სპორტი და ყოველი ვარჯიში ჩემთვის სიამოვნებაა. ძალიან ბევრი რამე მასწავლა ამ სპორტმა და წინა თაობის გამოცდილმა სპორტსმენებმაც დიდი წვლილი შეიტანეს ჩემს განვითარებაში.
გვესაუბრეთ ამერიკაზე. რა სირთულეების გადალახვა მოგიწიათ, როგორია თავის დამკვიდრება უცხო ქვეყანაში, მითუმეტეს აშშ-ში?
– როდესაც ცხოვრებას თავიდან იწყებ, ფაქტობრივად ნულიდან, ეს ყველა ქვეყანაში რთულია. მეც ასე დავიწყე ჩემი ამერიკული ცხოვრება, მაგრამ საბედნიეროდ გავიცანი ძალიან კარგი ქართველი ხალხი, რომელთაც მიმიღეს როგორც საკუთარი ოჯახის წევრი, დამეხმარნენ პირველი ნაბიჯების გადადგმაში და დღესდღეობით უკვე გადალახულია უამრავი სიძნელე. ყველაზე რთული ეტაპი გავლილია. ვშრომოვ, ვვარჯიშობ და ვცდილობ თავი დავიმკვიდრო, მივაღწიო მაქსიმალურ წარმატებას და მინდა, კიდევ ბევრჯერ ვასახელო ჩემი საქართველო.
ნოდარ, სამჭიდის გარდა კიდევ რითი ხართ დაკავებული? ანუ რა არის თქვენი ჰობი?
– ამ ეტაპზე პარალელურად ვმუშაობ სამშენებლო კომპანიასა და დაცვის კომპანიაში, სადაც მეგობრები და კომპანიის ბოსი მაქსიმალურად მიწყობენ ხელს, რათა სპორტულ ცხოვრებას მეტი ყურადღება დავუთმო. ჰობს რაც შეეხება, ძალიან მიყვარს კითხვა (აქაც კი ქართულ წიგნებს ვკითხულობ და პერიოდულად ვაგზავნინებ ხოლმე საქართველოდან) და კალათბურთის ყურება. თავისუფალ დროს ძირითადად ამას ვუთმობ.
ნოდარ, რას გეგმავთ მომავალში. მოგვიყევით უახლოესი შეჯიბრებების შესახებ.
– 11 ნოემბერს მივფრინავ ფლორიდაში, ქალაქ ორლანდოში , სადაც გაიმართება მსოფლიო ჩემპიონატი. მონაწილეობას ვიღებთ სამი ქართველი და ვიბრძოლებთ იმისათის, რომ კიდევ ერთი გამარჯვება მოვუტანოთ ჩვენს საქართველოს. მომავალში კიდევ იგეგმება ბევრი სპორტული ღონისძიება. ვემზადები და ვცდილობ მაქსიმალურად ვიყო კარგ ფორმაში. მარიამ, მადლობა თქვენ და თქვენ რედაქციას იმისათის, რომ გამონახეთ დრო ჩემთვის და ჩემი სპორტისათვის. ძალიან სასიამოვნოა ყურადღება ჩემი ქვეყნიდან. ეს ყველაფერი უფრო და უფრო აძლიერებს ჩვენს მოტივაციასა და ბრძოლის ჟინს. გისურვებს წარმატებას.
მარიამ გობიანიძე