„პროკურატურა გიორგის არ ედავება გასაღებას, ედავება პირად მოხმარებას. საკონსტიტუციო სასამართლომ თქვა, რომ შეგიძლია პირადი მოხმარებისთვის 1-წლიანი მარაგიც კი გქონდეს და ეს არ აღძრავს ეჭვებს,რომ შენ ეს გასაღებისთვის გინდა. ის ოდენობა,რაც გიორგის ჰქონდა, არის გაცილებით მცირე, მართლაც რომ ჰქონოდა“ , – ამის შესახებ კონსტიტუციონალისტმა ვახუშტი მენაბდემ „ტვ პირველზე“, „პოლიტმეტრის“ ეთერში ისაუბრა.
„ აქ არის პრობლემა, რომ 8 წლით პატიმრობა არის დრაკონული პოლიტიკის გაგრძელება. წინა ხელისუფლების „ნულოვანი ტოლერანტობის“ პოლიტიკა ფაქტობრივად არ შეცვლილა. რაც უნდა სტატისტიკა მოგვიყვანონ,რომ პატიმრების რაოდენობა შემცირდა, ეს ყველაფერი ანულირდება, ბათილდება იგივე პოლიციური ტერორით, რომელიც წელიწადში რამდენჯერმე ეხება მოქალაქეს.
ჩვენი დღევანდელი კანონმდებლობა ზუსტად გამოხატავს იმ განწყობას, რომელიც ჩვენს ხელისუფლებას აქვს და ჰქონდა წინა ხელისუფლებას. ეს პრობლემები არსებობს და მათ გადასაჭრელად იქნება აქცია მთავრობის კანცელარიასთან, რომ დავამტკიცოთ დღევანდელი ნარკოპოლიტიკის არაადამიანურობა. ან დავსაჯოთ, ან უგულებელვყოთ, თითქოს ან თავის ნებაზე უნდა მივუშვათ, ან ციხეში ამოვალპოთ ადამიანი. მესამე გამოსავალია სახელმწიფო ზრუნვა, რომელიც არ მიატოვებს ადამიანებს პრობლემებთან მარტო. ეს მოხდება იმ კანონმდებლობით, რომლის მიღებასაც პარლამენტი აჯანჯლებს“ , – განაცხადა ვახუშტი მენაბდემ.
მანანა ღოღობერიძე