არასამთავრობო ორგანიზაცია ადამიანის უფლებების სწავლებისა და მონიტორინგის ცენტრის (EMC) განცხადებით, “პოლიციის შესახებ” კანონპროექტის მიღებამდე მნიშვნელოვანია , რომ ინიციატორმა სათანადოდ დაასაბუთოს პოლიციის პრევენციული უფლებამოსილებების გაზრდის საჭიროება და მიზანშეწონილება.
EMC-ს ცნობით, ასევე, სისტემურად უნდა იქნეს შეფასებული და დაგეგმილი სამართალდამცავი უწყებების უფლებამოსილებების გაფართოების პარალელურად კონტროლის ადეკვატური მექანიზმების შექმნის საკითხი.
“კანონპროექტით მნიშვნელოვნად ფართოვდება პოლიციის პრევენციული უფლებამოსილებები. შემოთავაზებული ცვლილებების ანალიზი მიუთითებს, რომ კანონპროექტი არსებითად ცვლის ხელისუფლების პოლიტიკასა და მიდგომებს სამართალდაცვითი საკითხების მიმართ, პოლიციას ენიჭება მნიშვნელოვანი ძალაუფლება პრევენციული მიზნებისთვის ჩაერიოს პირის თავისუფლებაში და გამოიყენოს ერთგავარად რეპრესიულ-პრევენციული მეთოდები დანაშაულის თავიდან აცილების ან/და აღკვეთის მიზნით. შემოთავაზებულ მოდელში, უსაფრთხოების კოლექტიური ინტერესი ანაცვლებს კერძო პირის ლეგიტიმურ ინტერესს, დაცული იყოს სამართალდამცავი ორგანოების მხრიდან ინტერვენციისგან. კანონპროექტში მოცემული არგუმენტაცია კი არასაკმარისია პოლიციის პრევენციული უფლებამოსილებების ასეთი მკვეთრი გაფართოების დასაბუთებისთვის”, – აცხადებენ ორგანიზაციაში.
EMC-ის განცხადებით, პოლიციის უფლებამოსილებების ზრდის პროცესში გასათვალისწინებელია ასევე სამართალდამცავი უწყებების საქმიანობის კონტროლის მექანიზმების როლი და საჭიროება, რომ ქმედითი ღონისძიებები იქნას გატარებული დამოუკიდებელი, ეფექტური და ობიექტური საზედამხევდელო მოდელის შესაქმნელად. მხოლოდ ასეთი მექანიზმის პირობებშია შესაძლებელი სამართალდამცავი ორგანოების მზარდი უფლებამოსილებებისა და საქმიანობის კანონიერების კონტროლი.
25.09.13