დუბაიში, რას-ალ-ხაიმას საამიროს ამირთან, შეიხ საუდ იბნ საკრ ალ-კასიმთან შეხვედრაზე
ეკონომიკისა და მდგრადი განვითარების მინისტრმა დიმიტრი ქუმსიშვილმა საინვესტიციო პროექტები განიხილა. ინფორმაციას სამინისტრო ავრცელებს.
უწყების ცნობით, საუბარი შეეხო იმ საინვესტიციო პროექტებს, რომლებიც საქართველოში სახელმწიფო საინვესტიციო სააგენტო „რაკიას“ მეშვეობით ხორციელდება. მათ შორის ცნობილი გახდა, რომ სასტუმრო “შერატონი ს“ რენოვაცია სექტემბერში დასრულდება.
„საერთო ჯამში, რას-ალ ხაიმას საინვესტიციო სააგენტოს მიმდინარე პროექტების მოცულობა 220 მილიონ დოლარზე მეტია. ეს არის „თბილისი მოლი“, რომელიც ყველა თბილისელისა და ტურისტისთვის მნიშვნელოვანი სავაჭრო ადგილია. ასევე სასტუმრო „შერატონი“, რომლის რენოვაციაც მიმდინარეობს და სექტემბრისთვის უნდა დასრულდეს. „შერატონის“ რენოვაცია საერთო ჯამში, 51 მილიონი დოლარი დაჯდება, ამავე დროს მხოლოდ გასართობი ცენტრის მიმართულებით დამატებით კიდევ 9 მილიონი დოლარის ინვესტიცია განხორციელდება“, – აღნიშნა პირველმა ვიცე-პრემიერმა დიმიტრი ქუმსიშვილმა.
ეკონომიკის სამინისტროს ინფორმაციით, „რაკია“ საქართველოს ეკონომიკის ერთ-ერთი მსხვილი ინვესტორია. მას ქვეყანაში 400 მლნ აშშ დოლარის ოდენობის ინვესტიცია აქვს ჩადებული.
სასტუმრო შერატონი, რეკონსტრუქციის მიზნით, 2014 წლის 1 დეკემბერს დაიხურა. გახსნის თარიღად ჯერ 2016 წელი, შემდეგ კი, 2017 წელი დასახელდა.