წელს გადამუშავებული ყურძნის რაოდენობა შარშანდელთან შედარებით გაზრდილია

სოფლის მეურნეობის სამინისტრო “რთველი – 2013”-ის შეგდეგებს აქვეყნებს. სოფლის მეურნეობის სამინისტროს ინფორმაციით, კახეთის რეგიონში “რთველი-2013” 25 აგვისტოს დედოფლისწყაროს რაიონიდან დაიწყო.

29 სექტემბრის მდგომარეობით წელს, კახეთის რეგიონში 81 კომპანიის მიერ მიღებული და გადამუშავებულია ბოლო ათეული წლების მანძილზე რეკორდული რაოდენობის ყურძენი 80097,6 ტონა (შარშან სულ გადამუშავდა 52 000 ტონა). მათ შორის: საფერავი – 25570,8 ტონა, რქაწითელი – 51660,6 ტონა, მწვანე კახური – 1406 ტონა, სხვა ჯიშები – 1406,2 ტონა.

ყურძნის მიღება–გადამუშავების პროცესში ჩართული 81 კომპანიიდან 79 არის კერძო და ორი სახელმწიფო (შპს “გრუზვინპრომი” და შპს “აკურა”). სახელმწიფო კომპანიების მიერ შესყიდული და გადამუშავებულია 12479,6 ტონა ყურძენი, რაც საერთო რაოდენობის 15%-ს შეადგენს. (ცნობისათვის, 2012 წელს სახელმწიფო კომპანიების მიერ გადამუშავებული ყურძნისწილი 65 %-ს შეადგენდა).

რთველის წინასწარი პროგნოზი სრულად გამართლდა. კერძო სექტორის იაფი კრედიტითა და ფასის სუბსიდირების შედეგად საფერავზე მოთხოვნა იყო ძალიან დიდი, რის გამოც საფერავის ჯიშის ყურძნის ათვისება მთლიანად კერძო სექტორის მიერ ხდება, სახელმწიფოს მხოლოდ ჭარბი თეთრი ყურძნის ჩაბარება უწევს (“გრუზვინპრომის” მიერ მხოლოდ 190 ტონა დაზიანებული საფერავია ჩაბარებული, ხოლო დანარჩენი რაოდენობა თეთრ ყურძენზე მოდის).

რაიონების მიხედვით შესყიდული და გადამუშავებული ყურძნის მაჩვენებელი შემდეგია: სიღნაღის რაიონი – 11757,6 ტონა; გურჯაანის რაიონი – 18095,1 ტონა; თელავის რაიონი – 17725 ტონა; ყვარლის რაიონი – 17199,8 ტონა; დედოფლისწყაროს რაიონი – 3965,8 ტონა; ახმეტის რაიონი – 2471,6 ტონა; ლაგოდეხის რაიონი – 3719,3 ტონა; საგარეჯოს რაიონი – 5162,7 ტონა.
განსაკუთრებული მოთხოვნაა მევენახეობის სპეციფიკურ ზონებში (“მუკუზანი”, “ახაშენი”, “ქინძმარაული”) მოწეულ საფერავის ჯიშის ყურძენზე, რისგანაც მზადდება ადგილწარმოშობის დასახელების ღვინოები. აღნიშნულის გამო ერთ კილოგრამ საფერავზე უკანასკნელ დღეებში დაფიქსირდა ფასების მნიშვნელოვანი ზრდა. საფერავის მაქსიმალურმა ფასმა 2,10 ლარი შეადგინა. თუმცა, ამ ფასად შეძენილი და გადამუშავებული იქნა მხოლოდ 76 ტონა ყურძენი.
რქაწითელის მაქსიმალური ფასი შეადგენს 1,40 ლარს. ამ ფასად შეძენილი და გადამუშავებული იქნა მხოლოდ 72 ტონა ყურძენი, უმეტესად წინანდლის მიკროზონაში. მწვანე კახურის მაქსიმალურმა ფასმა 1,45 ლარი შეადგინა. ამ ფასად შეძენილი და გადამუშავებული იქნა 98 ტონა ყურძენი, ძირითადად მანავის მიკროზონაში.

კერძო სექტორისთვის ნაკლებად საინტერესოა სიღნაღის რაიონისა და ლაგოდეხის თეთრი ყურძენი, რომლის ჩაბარებაც სახელმწიფო საწარმოებს უწევთ, თუმცა ეს პროცესი მიდის საკმაოდ ფრთხილად, კერძო სექტორის ინტერესების მაქსიმალური გათვალისწინებით.

წითელი ყურძნის (საფერავი) გადამუშავების პიკი 12 სექტემბერს დაფიქსირდა – ერთ დღე-ღამეში გადამუშავდა 4,500 ტონა, ხოლო თეთრი ყურძნის (რქაწითელი, კახური მწვანე) გადამუშავების პიკი დაფიქსირდა 25 სექტემბერს – დღე-ღამის განმავლობაში 3,800 ტონა ყურძენი გადამუშავდა. რთველი მალე დასრულდება, რასაც ადასტურებს მიღება-გადამუშავების ბოლო დღეების მონაცემები. 29 სექტემბრის მდგომარეობით დღე-ღამეში 1,978 ტონა ყურძენი გადამუშავდა. საფერავის მოსავალი მიილია და მისი დღიური გადამუშავება დაახლოებით 30-40 ტონას შეადგენს.

ღვინის კომპანიებს შორის შეიძლება აღინიშნოს შპს “GWS”, შპს “ტიფლისსკი ვინნი ოგრებ”, შპს “ბადაგონი”, შპს “დუგლაძეების ღვინოების კომპანია”, შპს “ვაინმენი”, სს “თბილღვინო”, სს “თელიანიველი”, შპს “თელავის ღვინის მარანი”, შპს “კახური ტრადიციული მეღვინეობა”, შპს “კორპორაცია ქართული ღვინო”, შპს “წინანდლის ძველი მარანი”, რომლებმაც უკვე გადაამუშავეს ათას ტონაზე მეტი ყურძენი და კვლავაც აგრძელებენ ყურძნის შესყიდვას.

30.09.13